“Зўравонликсиз дунё хаёлдаги орзу эмас, бу биргаликда эришса бўладиган мақсаддир” — Шаҳноза Мирзиёева

Жаҳон ҳамжамияти 25 ноябрни Хотин-қизларга нисбатан зўравонликка барҳам бериш куни сифатида нишонлайди. Ижтимоий ҳимоя миллий агентлиги директори биринчи ўринбосари Шаҳноза Мирзиёеванинг ёзишича, бу сана ҳар бир аёл эъзозланадиган, сўзи тингланадиган, орзулари келажак сари йўлга айланадиган дунёда яшашга лойиқ экани ҳақидаги навбатдаги эслатмадир.

“Бугун биз биргаликда зўравонликка нисбатан: “Етар, бас!” дея хитоб қиламиз. Қўрқув ва шубҳа-гумонларни ишонч ҳиссига айлантириш вақти келди. Ҳар бир аёл тингланиши ва севикли бўлишига эришиш фурсати етди.

Ижтимоий ҳимоя миллий агентлиги нафақат сўзда, балки амалда ҳам гапиради: Биз қўллаб-қувватлаш учун шу ердамиз! Биз ҳимоя қилиш учун шу ердамиз! Биз ҳар бир аёл, ҳар бир қиз ҳаёти қадрли бўлиши учун курашяпмиз! Зўравонликсиз дунё хаёлдаги орзу эмас, бу биргаликда эришса бўладиган мақсаддир”, деб ёзди Шаҳноза Мирзиёева ва зўравонликка қарши кураш бўйича Ижтимоий ҳимоя миллий агентлиги вакили Диёра Келдиёрова иштирокидаги видеолавҳани эълон қилди.

Унда Диёра Келдиёрова зўравонликка учраган аёл образини акс эттирган.

“Бу менинг ҳаётим эмас. Мен зўравонликка қаршиман. Биз ўзимиз ва фарзандларимиз ҳаёти учун курашамиз. Биринчи қадамни қўйишдан қўрқманг”, дейди Келдиёрова видеолавҳада.

Диёра Келдиёрова 2024 йилнинг августида Ижтимоий ҳимоя миллий агентлигининг гендер тенгсизлиги ва болаларга нисбатан зўравонликка қарши курашиш бўйича махсус вакили этиб тайинланганди.

У ўзбек дзюдоси тарихида илк бор олтин медални қўлга киритган спортчидир. 28 июль куни дзюдо бўйича Ўзбекистон терма жамоаси аъзоси Диёра Келдиёрова -52 кг вазн тоифасида Париж Олимпиадасида ғолибликни қўлга киритганди.

Шаҳноза Мирзиёева у билан учрашиб, Ижтимоий ҳимоя миллий агентлиги билан ҳамкорликда бир қанча лойиҳаларни амалга оширишни таклиф қилганди.

“Қудрат ва бардош рамзи бўлмиш ўзбек қизи Диёра Келдиёровага бугунги иштироки учун миннатдорлик билдираман”, деб ёзди Шаҳноза Мирзиёева.