Европа Иттифоқининг ташқи ишлар ва хавфсизлик сиёсати бўйича олий вакили Кая Каллас Исроилга чора кўришга тайёрлигини эълон қилди. Бу ҳақда Anadolu хабар берди.
Иттифоқнинг таъкидлашича, Исроил Ғазодаги гуманитар вазиятни яхшилаш бўйича ўз мажбуриятларини бажараётгани “қатъий кузатув” остида. Каллас матбуотга баёнот бериб, Ғазода гуманитар вазият яхшиланаётганидан далолат берувчи баъзи ижобий ўзгаришлар борлигини таъкидлаган. Шу билан бирга Исроил сектордаги шароитни яхшилаш учун кўпроқ аниқ қадамлар қўйиши кераклиги таъкидланган.
Калласга кўра, ЕИ Исроил ўз мажбуриятларини бажараётганини мунтазам равишда баҳолаб боради.
“Биз келишувларнинг бажарилишини қатъий кузатув остига оламиз. Ҳар икки ҳафтада Исроилнинг келишув доирасидаги ҳаракатлари тўғрисида янгиланган ҳисобот берилади”, деди у.
Қўшимча қилинишича, Исроилга қарши эҳтимолий чоралар тақдим этилган.
“Биз бу чора-тадбирларни муҳокама қилдик. Қарор аъзо давлатлар томонидан қабул қилинади. Бу борада бир неча вариантлар берилди. Агар Исроил ўз мажбуриятларини бажармаса, биз чора кўришга тайёрмиз. Мақсадимиз Исроилни жазолаш эмас, балки Ғазодаги вазиятни ҳақиқатан ҳам яхшилашдир”, деган Каллас.
ЕИ 10 июль куни Исроил билан қуйидаги йўналишларда келишувга эришилганини маълум қилганди:
- Ғазога кунлик озиқ-овқат ва бошқа товарлар импортини кўпайтириш;
- Иордания ва Миср орқали гуманитар йўлакларни қайта очиш;
- новвойхоналар ва ошхоналар орқали озиқ-овқат тарқатишни ташкил этиш;
- гуманитар инфратузилма учун ёнилғи таъминотини тиклаш;
- гуманитар ходимлар ҳимоясини таъминлаш;
- сув тозалаш иншоотларида электр энергиясини тиклаш.
Изоҳ (0)