Таниқли тожик блогери ва қўшиқчиси Абдурозиқ Дубай халқаро аэропортида полиция томонидан ҳибсга олинди. Маҳаллий ОАВ хабар беришича, 21 ёшли ижтимоий тармоқлар юлдузи ўғриликда гумон қилинмоқда.
Маълумотларга кўра, у эрта тонгда Черногориядан Дубайга учиб келган ва дарҳол аэропорт ҳудудида қўлга олинган. Ҳозирда унинг иши бўйича тергов ҳаракатлари олиб борилмоқда. Расмий органлар ҳолат юзасидан ҳозирча батафсил изоҳ берганича йўқ.
Бўйи тахминан бир метр бўлган Абдурозиқ Марказий Осиё ва Яқин Шарқда энг машҳур блогер ва хонандалардан бири ҳисобланади. У ўзининг сатирик ва кулгили видеолари, ашулалари ҳамда турли реалити-шоулар, жумладан, Ҳиндистоннинг машҳур Bogg Boss 16 лойиҳасидаги иштироки орқали кенг аудиторияга танилган.
Сўнгги уч йил ичида Абдурозиқ Бирлашган Араб Амирликларининг “олтин” визасига эга бўлиб, доимий равишда Дубайда истиқомат қилиб келаётган эди. У 2024 йилда Cоcа Cola Arena саҳнасида илк бор бокс рингига чиқиб, спорт соҳасида ҳам ўзини синаб кўрди. Сўнг Буюк Британияда Ҳабиби номли ўзининг ресторан брендини йўлга қўйди.
Ўтган йили ҳам Абдурозиқ Ҳиндистон ҳуқуқ-тартибот органлари томонидан сўроқ қилинган эди. У меҳмонхона бизнесига оид, пул ювиш билан боғлиқ тергов доирасида кўрсатма берган. Бироқ ўшанда у айбланувчи эмас, гувоҳ сифатида иштирок этган. Ижтимоий тармоқларда фаол бўлган блогер ҳозирда 8 миллиондан ортиқ кузатувчига эга.
Изоҳ (0)