Агар Европа давлатлари Теҳрондан тинч ядро дастурини ривожлантириш ҳуқуқидан воз кечишни талаб қилишда давом этса, Эрон улар билан олиб бориладиган музокараларни фойдасиз деб ҳисоблайди. Бу ҳақда ислом республикаси Ташқи ишлар вазири Аббос Ароқчи маълум қилди.
“Агар Қўшма кенг қамровли ҳаракат режаси бўйича комиссия мувофиқлаштирувчиси (ЕИ ташқи сиёсат раҳбари Кая Каллас назарда тутилмоқда) келажакдаги ҳар қандай музокараларнинг мақсади “Эрон ядро дастурини тўхтатиш” эканига ишонса, у ҳолда ЕИ ва Буюк Британиянинг келажакдаги музокараларда иштироки ўз долзарблигини йўқотади ва маъносиз бўлиб қолади”, дея таъкидлади Ароқчи.
У шу тарзда Калласнинг Эрон ядро дастурини “тўхтатиш” бўйича музокараларни иложи борича тезроқ қайта бошлаш зарурлиги ҳақидаги баёнотларига муносабат билдирган.
Эронлик дипломатнинг таъкидлашича, Калласнинг баёнотларидан келиб чиқадики, энди у учун Ядро қуролини тарқатмаслик шартномаси (ЯҚТШ)га қўшилган барча мамлакатларнинг тинч атом энергиясини ривожлантириш ҳуқуқи тўғрисидаги қоидалари ҳам, ядро битимининг ўзи ва у билан боғлиқ БМТ Хавфсизлик Кенгашининг 2231-сонли резолюцияси ҳам аҳамиятсиз бўлиб қолган.
2015 йилда Эрон ҳамда Буюк Британия, Германия, Хитой, Россия, АҚШ ва Франция Қўшма кенг қамровли ҳаракат режасини (ҚКHR) имзолаб, 2002 йилда Ғарбнинг Теҳронни ядро қуролини ишлаб чиқаришда айблаши туфайли бошланган инқирозга барҳам берди. Бироқ 2018 йилда АҚШ президенти Дональд Трамп келишувдан чиқишини эълон қилди ва Американинг Эронга қарши барча санкцияларини тиклади. Бунга жавобан, 2020 йилда ислом республикаси ҚКHR бўйича ўз мажбуриятларини қисқартиришини ва Халқаро атом энергияси агентлиги инспекторларининг мамлакат ядро объектларига киришини чеклашини маълум қилди.
2025 йилда Эроннинг АҚШ билан олиб борган беш босқичли музокаралари Исроилнинг ислом республикасига қарши ҳарбий операцияси бошланиши ва АҚШ Қуролли Кучларининг Эрон ядро объектларига зарбалари туфайли натижасиз якунланди. Шу билан бирга, Теҳрон билан Эрон атоми бўйича янги келишув тузишда воситачилик қила олмаган Европа учлиги (Буюк Британия, Германия ва Франция) вакиллари ҳам музокаралар олиб борди.
Бундан аввал Эрон президенти Масъуд Пезешкиён Халқаро атом энергетикаси бўйича агентлик (МАГАТЭ) билан ҳамкорликни тўхтатувчи қонунни имзолангани хабар қилинганди.
Изоҳ (0)