Тожикистон қишлоқ хўжалиги вазирлиги баёнотига кўра, мамлакат аҳолисининг мол ва қўй гўштига эҳтиёжи ошиши ортидан гўшт нархи кўтарилиб кетгани ҳақида аввалроқ хабар берилган эди.
Масъулларнинг таъкидлашича, аҳоли 99,9 фоиз гўшт билан таъминланмоқда, лекин унинг нархи тушмаётганининг сабаби бозор талабининг ошиши ва хориждан келтираётган озуқа импортидир.
Айни вақтда Тожикистон пойтахти Душанбенинг айрим бозорларида бир килограмм мол гўштининг нархи 80-82 сомонидан — 95-97 минг сўмдан сотилмоқда. Қўй ва эчки гўшти эса 85 сомони — 101 минг сўмгача етган.
Ҳолбуки илгари мамлакатда мол гўштининг ўртача нархи 71 сомони — 84 минг сўм, қўй гўшти 75 сомони — 89 минг сўм, фақат Панжикент ва Хўжандда 80 сомонидан — 95 минг сўмдан юқори бўлган. Энг паст нарх Хорогда қайд этилиб, 1 килограмм гўшт 64 сомонини — 76 минг сўмни ташкил этган.
Ҳозир Тожикистон гўшт экспорт ва импорт тўхтатиб қўйган.
Қўшни мамлакатда гўшт нархининг ошиши Ўзбекистондаги гўшт нархига қанчалик таъсир қилади?
Мазкур савол юзасидан Ветеринария ва чорвачиликни ривожлантириш давлат қўмитаси ахборот хизмати “Дарё”га жавоб берди.
Қўмита тақдим этган маълумотга кўра, Ўзбекистон Тожикистондан гўшт сотиб олмайди ва кузатилаётган ҳолат мамлакат ички бозорига ҳеч қандай таъсир ўтказмайди.
Маълум қилинишича, Ўзбекистон аҳолисига етказиб берилаётган гўштнинг 96,6 фоизи маҳаллий, 4,4 фоизи эса импорт ҳисобига тўғри келади. Покистон, Россия, Белорус ва Қозоғистондан келтириладиган гўшт тўғридан тўғри бозорга эмас, қайта ишлашга юборилади.
-vMP8dgkU.jpg)
Иқтисодиёт ва молия вазирлиги тақдим этган маълумотда 29 июль ҳолатига кўра, Тошкентдаги “Чорсу” деҳқон бозорида 1 килограмм мол гўшти 60 минг сўмдан 70 минг сўмгача, қўй гўшти эса 65 минг сўмдан 70 минг сўмгача улгуржи нархларда таклиф этилмоқда.
“Дарё” мамлакатдаги гўшт нархини кузатиб боради.
Изоҳ (0)