Ўзбекистонда асосий озиқ-овқат маҳсулотлари учун кредитларни қайтариш муддати 2025 йил 1 июлга қадар узайтирилди.
Бу ҳақда “Ички истеъмол бозорини асосий турдаги озиқ-овқат маҳсулотлари билан таъминлаш бўйича қўшимча чора-тадбирлар тўғрисида”ги ҳукумат қарорида белгиланди.
Вазирлар Маҳкамасининг 2021 йил 7 октябрдаги қарорига мувофиқ озиқ-овқат маҳсулотларини импорт қилишда тадбиркорлик субъектларини айланма маблағлар билан таъминлаш мақсадида Тикланиш ва тараққиёт жамғармаси 32,8 миллион доллар эквивалентида миллий валютада ҳамда Иқтисодиёт ва молия вазирлиги 200 миллиард сўм миқдордаги маблағларни фоизсиз депозитга жойлаштириши учун ажратди. Ушбу маблағлар тижорат банкларига уларнинг сўровларига асосан 2024 йил 1 июлга қадар қайтарилиши керак эди.
Ҳужжат билан Вазирлар Маҳкамасининг ушбу қарорига ўзгартириш киритилмоқда, унга асосан қайтариш муддати 2025 йил 1 июлга қадар узайтирилди. Ушбу қарор Республикада аҳолини ижтимоий муҳим турдаги озиқ-овқат маҳсулотлари билан барқарор нархларда узлуксиз ва кафолатли таъминлаш мақсадида қабул қилинди.
Белгиланишича, Тикланиш ва тараққиёт жамғармаси ҳамда Иқтисодиёт ва молия вазирлигининг фоизсиз депозитлари ҳисобидан кредитлар тижорат банклари томонидан тадбиркорлик субъектларига ликвидли гаров таъминоти асосида ўсимлик ёғи, картошка, гуруч, шакар хом ашёси, гўшт (мол, қўй, парранда гўшти), музлатилган балиқ импорти учун йиллик 4 фоиз ставкада ажратилади.
Изоҳ (0)