Украина Россия томонига август ойининг охиригача Ражаб Тоййиб Эрдўғон ва Дональд Трамп иштирокида иккала давлат раҳбарлари учрашувини ўтказишни таклиф қилди. Бу ҳақда Украина делегацияси раҳбари Рустем Умеров маълум қилди.
23 июль куни Истанбулдаги Чароғон саройида Россия ва Украина ўртасидаги тўлиқ таркибли тўғридан-тўғри музокараларнинг учинчи босқичи ўтказилди.
Туркия ташқи ишлар вазири Ҳоқон Фидан музокаралар бошланишидан аввал сўзлаган нутқида Анқара Россия-Украина можаросини ҳал этиш бўйича музокараларнинг муваффақиятли бўлишига умид билдирди ҳамда тинчлик ўрнатиш ва асирларни айирбошлаш масалаларида ҳар томонлама кўмаклашишини таъкидлаган.
Шундан сўнг ёпиқ тартибда икки томонлама музокаралар олиб борилган. Музокаралар бир соатдан камроқ вақт давом этган. Бунда томонлар нафақат ҳарбийлар, балки фуқаролар билан ҳам алмашиниш бўйича келишувга эришган.
Украина Миллий хавфсизлик ва мудофаа кенгаши котиби, делегация раҳбари Рустем Умеровнинг маълум қилишича, Украина Россия томонига август ойининг охиригача Ражаб Тоййиб Эрдўғон ва Дональд Трамп иштирокида иккала давлат раҳбарлари учрашувини ўтказишни таклиф қилган.
“Украина самарали дипломатиянинг зарурий асоси сифатида тўлиқ ва сўзсиз ўт очишни тўхтатишни талаб қилишни давом эттирмоқда”, деди Умеров.
Унинг айтишича, Украина ўт очишни тўхтатишга ва тинчлик музокараларини бошлашга тайёр.
“Биз ўт очишни тўхтатиш ҳақиқий бўлиши кераклигини таъкидлаймиз. Бу фуқаролик объектлари ва муҳим инфратузилма иншоотларига ҳужумларни бутунлай тўхтатишни ўз ичига олиши шарт”, дея қўшимча қилди у.
Россия Федерацияси президенти маслаҳатчиси Владимир Мединскийнинг ма`лум қилишича, Россия ва Украина ўртасида ҳар икки томондан 1200 га яқин киши алмашинуви амалга оширилишига келишиб олинган.
Унинг айтишича, Россия Украина томонига Украина Қуролли Кучлари ҳарбийларининг яна 3 минг жасадини топширишни ҳам таклиф этган.
“Россия Федерацияси ва Украина айни пайтда ҳар икки томондан 250 нафардан ҳарбий асирни алмашинишни якунламоқда”, дейди Мединский.
Россия музокаралар гуруҳи раҳбари та`кидлашича, Россия ва Украина делегациялари меморандумларни узоқ вақт муҳокама қилишган, бироқ томонларнинг нуқтаи назарлари ҳали ҳам бир-биридан анча узоқ.
“Россия келишувларнинг 101 та банди тўлиқ бажарилмаганини таъкидлади. Россия ва Украинанинг меморандумлар бўйича позициялари ҳамон бир-биридан анча узоқ”, дея қайд этди у.
Шунга қарамай Мединскийнинг айтишича, Россия Федерацияси ва Украина меморандумларни муҳокама қилиш учун мулоқотни давом эттиради.
Бундан аввал Истанбулда 16 май ва 2 июнь кунлари Россия ва Украина ўртасида тинчлик музокараларининг дастлабки икки раунди бўлиб ўтганди. Биринчи учрашув асирларни алмашиш (1000 га 1000) ва ўт очишни тўхтатиш бўйича таклифлар тайёрлаш бўйича келишувлар билан якунланди. Музокараларнинг иккинчи раунди эса меморандумлар алмашинуви ва ҳарбий асирлар алмашинуви бўйича янги келишувга эришилганди.
Изоҳ (0)