Нигерия Фавқулодда вазиятлар бошқармасининг маълум қилишича, Моква шаҳрида сув тошқини юз берганидан сўнг қурбонлар сони 115 кишидан ошиб кетган. Бу ҳақда BBC хабар берди.
Аҳолиси 3000 кишидан ортиқ бўлган 500 дан ортиқ уй хўжаликлари зарар кўрган. Баъзилар икки-беш нафаргача оила аъзоларини йўқотгани айтилмоқда. 1 нафар шахс Нигер дарёсида чўкиб кетган. Қурбонлар янада ошиши мумкинлиги билдирилган.
Маҳаллий ҳокимият 11 киши қутқарилиб, шифохонага етказилганини маълум қилган. Моква шаҳрининг Тиффин Маза ва Ангуван Ҳаусава туманлари энг кўп зарар кўрганлиги айтилмоқда. Маълум бўлишича, бундай сув тошқини охирги марта 60 йил олдин бўлган.
“Ҳукуматдан бизни қўллаб-қувватлашини сўраймиз”, деди зарар кўрган ҳудудлар раҳбарлари.
Мамлакатнинг шимолий ва жануби-ғарбий қисмларини боғловчи кўприк сув тошқинлари оқибатида қулаб тушган. Нигерия президенти Бола Тинубу барча тегишли фавқулодда вазиятлар ва хавфсизлик органларига давом этаётган қидирув-қутқарув ишларини кучайтиришни буюрган.
28-29 май кунлари мамлакатга кучли ёмғир ёғиб, сел оқимлари ёпирилган. Нигерияда ёмғирли мавсум эндигина бошланмоқда ва одатда апрелдан октябргача давом этади. Расмийлар мамлакатнинг 36 штатидан камида 15 тасида кучли жала ёғиши ҳақида огоҳлантирган.
Изоҳ (0)