Қиймати 102 минг доллар: Республика Маънавият ва маърифат маркази сайт ва мобил илова яратмоқчи

Тендер маълумотига кўра, сайт ва мобил илова яратиш орқали миллий қадриятларни тарғиб қилиш мақсад қилинган.

Республика Маънавият ва маърифат маркази “qadriyatim.uz”, “tanlov.manaviyat.uz” сайти ва мобил иловасини яратиш хизмати учун 1,3 миллиард сўмлик (102 минг доллар) тендер ўтказди. Бу ҳақда etender.uzex.uz платформасида маълум қилинган.

Платформага жойланган, марказ директори Отабек Ҳасанов имзолаган ҳужжатда ёзилишича, мазкур маблағ дастурий таъминот ва маҳсулотлар ишлаб чиқиш, ахборот технологиялари соҳасида консалтинг хизматларига сарфланади.

Тендер жорий йил 1 июлдан 8 июлгача ўтказилган ва бир йиллик баённома расмийлаштирилган.

Сайтга жойланган маълумотда лойиҳанинг тўлиқ номи “Миллий қадриятлар атласи” веб-сайти ва мобил иловаси экани ёзилган. Сайт ва мобил илова яратишда 2024 йил 21 февраль кунги президент фармонининг “жамиятда замонавий билимларни оширишга қаратилган қизиқарли тест саволларини ўз ичига олган ютуқли ўйин ва викториналарнинг махсус тизимини, уларнинг мобил иловасини яратиш” банди асос қилиб олинган. Шу билан бирга, давлат раҳбарининг 2023 йил 22 декабрда Республика Маънавият ва маърифат кенгаши кенгайтирилган йиғилишида берган топшириқлари асос сифатида келтирилган.

Қайд этилишича, лойиҳа мақсади — ўзбек миллий урф-одатлари, маросимлари, байрамлари, халқ ўйинлари каби қадриятлар тўғрисида тўлиқ маълумот бериш ҳамда уларни оммалаштириш. Сайт ва иловага жамиятда замонавий билимларни оширишга қаратилган қизиқарли тест (тарихий, маънавий, ижтимоий, сиёсий ва ҳ.к.) саволларини ўз ичига олган ютуқли ўйин ва викториналар жойланади.

Манфаатдор идоралар билан бирга “Энг яхши тасвирий санъат асари”, “Энг яхши видеоролик”, “Энг яхши аудиоролик”, “Энг яхши гифлар туркуми”, “Энг яхши лайфхак”, “Энг яхши вайнлар туркуми”, “Энг яхши Telegram канали”, “Энг яхши Facebook саҳифаси” ва “Энг яхши YouTube канали” танловлари ўтказилади, дейилади лойиҳа мақсади ҳақидаги ахборотда.

Ўзбекистонда вазирлик ва идоралар томонидан сайт яратиш учун сарфланадиган йирик маблағлар жамоатчилик муҳокамаларига сабаб бўлиб келади. Масалан, 2022 йил ноябрда Маҳаллабай ишлаш ва тадбиркорликни ривожлантириш агентлиги 8,4 миллиард сўм эвазига “Онлайн Маҳалла” ахборот тизимини яратишни буюртма қилганди. Мазкур буюртма тендер ўтказилмасдан амалга оширилгани жамоатчилик  эътирозларига сабаб бўлган. Антимонополия қўмитаси ҳолат юзасидан изоҳ бераркан, ушбу буюртма “Давлат харидлари тўғрисида”ги қонуннинг 71-моддасига асосан қонуний эканини маълум қилган.

Шунингдек, 2023 йилда маданият вазири Озодбек Назарбеков Ўзбекистонда давлат мукофотларига сазовор бўлган маданият ва санъат намояндалари порталини яратишга 488 миллион сўм ажратилиши бўйича буйруқ чиқарган. Маданият вазирлиги 15,5 миллиард сўмга иккита махсус автомобиль харид қилгани ҳам жамоатчилик муҳокамасига сабаб бўлган. Вазирлик бунга изоҳ бериб, харид президент қароридан келиб чиққан ҳолда амалга оширилганини асос қилиб келтирган.