Тошкент вилояти Қуйи Чирчиқ туманида ноқонуний чиқиндихона ташкил этган фуқаро салкам 4 йилга озодликдан маҳрум қилинди. Бу ҳақда Экология вазирлиги хабар берди.
Унга кўра, Тошкент вилояти Қуйи Чирчиқ туманида Чирчиқ дарёси ўзанида туман ҳокимлиги захирасида бўлган ер майдонини 2023 йилнинг май ойидан 2024 йилнинг январь ойига қадар ўзбошимчалик билан эгаллаб олиб, ҳеч қандай махсус рухсатномаларга эга бўлмасдан, ноқонуний чиқиндихона ташкил қилган ҳуқуқбузарга суд ҳукми ўқилди.
Аввалроқ Экология вазирлиги давлат инспекторлари томонидан Чирчиқ дарёсида навбатдаги рейд тадбирлари олиб борилган эди. Рейд давомида ўрганиш натижасида фуқаро М.Д. дарё ҳудудига чиқиндилар тўкиб, тўғон ҳосил қилгани аниқланган. Фуқаро бир неча бор огоҳлантирилишига қарамасдан, қурилиш чиқиндиларини ўзбошимчалик билан ташлаб кетаверган.
Судда М.Д.нинг тоифаланган ҳамда муҳофаза этиладиган табиий ҳудудлар режимини бузиб, ноқонуний чиқиндихона ташкил қилгани, ҳудудга чиқиндиларни маълум маблағ эвазига жойлаштириб келгани ўз исботини топди.
Фуқаро дарёга 126 433,70 куб метр чиқинди ташлангани оқибатида Вазирлар Маҳкамасининг 2021 йил 12 апрелдаги “Ўзбекистон Республикаси ҳудудида атроф-табиий муҳитларни муҳофаза қилишнинг иқтисодий механизмларини янада такомиллаштириш тўғрисида”ги 202-сонли қарорига асосан ҳисоб-китоб натижаларига кўра, давлат манфаатларига 3 миллиард 68 миллион 206 минг 171 сўм миқдорда зарар етказган.
Шунингдек, М.Д. “Табиатни муҳофаза қилиш тўғрисида”ги қонуннинг 22-моддаси ҳамда “Муҳофаза этиладиган табиий ҳудудлар тўғрисида”ги қонуннинг 41-моддасини қўпол равишда бузган.
Суд Жиноят кодексининг 59, 61-моддаларига асосан ҳуқуқбузарни 3 йил-у 9 ой муддатга озодликдан маҳрум қилди. Шунингдек, ундан давлат фойдасига 3 миллиард 68 миллион 206 минг 171 сўм зарар ундирилиши белгиланди.
Изоҳ (0)