Ижтимоий тармоқларда Хоразм вилояти Урганч туманида шоқоллар юргани айтилган хабарлар тарқалди. Вилоят Экология бошқармаси ҳолат юзасидан муносабат билдирди.
Унда айтилишича, ушбу ҳолат Урганч тумани, Чандирқиёт қишлоғи, “Бақайлар” маҳалласи ҳудудида кузатилган. Ҳозирда шоқолларни Ўзбекистоннинг “Ҳайвонот дунёсини муҳофаза қилиш ва ундан фойдаланиш тўғрисида”ги қонуни талабларига мувофиқ муҳофаза қилиш чораларини кўриш ҳамда инсон хўжалик фаолиятига зарар етказилишининг олдини олиш мақсадида ҳаваскор овчилар гуруҳи шакллантирилиб, ҳуркитиш ишлари олиб борилмоқда.
Маълумот учун, ҳуркитиш ишлари — бу бўрилар одамлар яшайдиган ҳудудларга яқинлашмаслиги учун олиб бориладиган профилактик чоралар, яъни уларни қўрқитиш ва ҳудуддан йироқлаштиришга қаратилган ҳаракатлардир.
Бундай ишлар қуйидагиларни ўз ичига олади:
шовқин чиқарувчи воситалардан фойдаланиш (масалан, петардалар, товушли қурилмалар);
олов ёки ёруғлик воситаларидан фойдаланиш;
ҳайвонларга ёқмайдиган ҳидли махсус моддаларни қўллаш;
аҳоли яшаш пунктлари атрофида тўсиқлар, панжаралар ёки электр тўрлар ўрнатиш;
бўрилар ҳаракатини кузатиб бориш ва уларнинг яқинлашиши аниқланса, махсус хизматлар томонидан огоҳлантириш ва зарур чоралар кўриш.
Бундай чоралар айниқса қишлоқ ҳудудларида, ўрмонларга яқин жойларда ёки қиш мавсумида овқат топа олмай аҳоли пунктларига тушиб қолган бўрилар хавфи ошганида қўлланилади.
Бўстонлиқ тумани Бурчмулла давлат ўрмон хўжалигига қарашли Ахсарсой ҳудудида қўнғир айиқ ўлдириб кетилгани ҳақида хабар берилганди. Шунингдек, Сурхондарёда яшайдиган, ўта ноёб тур бўлган, Халқаро ва Ўзбекистон Қизил китобига киритилган тарғил сиртлоннинг (дўлта) Шўрчи туманида ўлдирилгани ҳақида хабар берилган эди.
Бундан ташқари, Зомин миллий табиат боғи назоратчилари томонидан ҳудудни тунда назорат қилиш чоғида йўл бўйида айиқ юрганининг гувоҳи бўлган ва бу ҳолат мобил тасвирга олинган.
Изоҳ (0)