Бухоро, Тошкент шаҳри ва вилояти ҳудудларида ички ишлар органлари ходимлари пора олаётганда ушланган. Бу ҳақда 11 август куни Давлат хавфсизлик хизмати хабар берди.
Бухоро вилояти ИИБ ходими мансабдор танишлари орқали Бухоро шаҳрида кетаётган жиноят ишининг гумонланувчига оид қисмини тўхтатиб беришни ваъда қилган. Бунинг эвазига 13 минг доллар талаб қилган. ДХХнинг Бухоро вилояти бўйича бошқармаси ҳамда ички ишлар ва прокуратура органлари ҳамкорлигида ўтказилган тезкор тадбирда ходим пора олган вақтида қўлга тушган.
Яна бир ҳолат Тошкент вилояти ички ишлар бош бошқармаси қўриқлаш бошқармаси Ангрен шаҳар бўлими сафдор ходими билан юз берган. У бўлинма командири ўринбосари билан ўзаро тил бириктириб, хизмат мавқейидан фойдаланган ҳолда мансабдор танишлари орқали Оққўрғон туманида яшовчи фуқарони қўриқлаш бошқармасига ишга киритиб қўйиш эвазига 1500 доллар талаб қилади. ДХХнинг вилоят бўйича бошқармаси ҳамда прокуратура органлари ўтказган тезкор тадбирда сафдор ходим олдиндан минг доллар олган пайт ушланган.
ДХХ ўтказган навбатдаги тезкор тадбир давомида ИИВ Миграция ва персоналлаштириш департаменти “Тошкент” халқаро аэропортида паспорт-виза бўлими катта инспектори қўлга олинган. У мансаб ваколатидан фойдаланган ҳолда вояга етмаган шахснинг хорижга чиқиш биометрик паспортига уни хорижга олиб чиқиб кетаётган фуқарога ҳамроҳлик қилувчи штамп белгисини тезлаштирилган тартибда расмийлаштириб бериш эвазига 400 доллар сўраган. Пулни олган вақт ашёвий далиллар билан ушланган.
Терговга қадар текширув ҳаракатлари давомида катта инспектор 2025 йил бошидан ҳозирги кунгача Ўзбекистонда бўлиб турган 42 нафар чет эл фуқароларининг ҳар биридан 300-700 доллар пул олган. Уларга чиқиш визасини ҳамда саккиз нафар Ўзбекистон фуқаросига ҳамроҳлик қилувчи штамп белгисини тезлаштирилган тартибда расмийлаштириб бериш эвазига 200-400 доллар миқдоридаги пулларни пора сифатида олганлик ҳолатлари ҳам аниқланган.
Ҳозирда ушбу “қонун ҳимоячилари”га нисбатан жиноят ишлари қўзғатилиб, қамоқ эҳтиёт чораси қўлланилган. Тергов ҳаракатлари олиб борилмоқда.
Изоҳ (0)