“Ракурс” подкастининг навбатдаги сонида педагог ва сиёсатшунос Ҳамид Содиқ иштирок этди. Журналист Эркин Ҳасан у билан олий таълим ва унда қўйилаётган камчиликлар ҳақида суҳбатлашди.
— Бу йил олий таълимга қизиқувчилар сони охирги 7 йилликда энг кам кўрсаткични ташкил қилди. Бу олий таълимга қизиқиш сусайганидан далолат берадими?
— Аслида бунинг маълум бир социологияси бор, тўғридан-тўғри қизиқиш ҳам камайди деб бўлмайди. 2018 йилга қадар юртимиздаги олий ўқув юртлари 70 тани ҳам ташкил қилмасди. Шу боисдан ҳам уларга бўлган талаб ниҳоятда юқори эди. Охирги 4-5 йил давомида университетларнинг сони 200 тадан ошиб кетди. Университетлар сони ортганидан кейин бир неча йил ўқишга киролмаганларда ҳам имконият пайдо бўлди. Шу боис охирги йилларда миллионга яқин ёки ундан ортиқ абитуриентлар ҳужжат топширди. Сиртқи ва кечки таълимлар сабаб талаблар қондирилди. Бундан бу ёғига эса ўқишга кирувчилар сонининг камайиши яққол сезилади.
Бундан ташқари, илгари ўқишга кириш ёшларнинг бош мақсади эди. Бола қизиқишидан қатъи назар, олий маълумотли бўлиши мажбурияти бор эди. Шу боис олий таълим етарлича коррупция ботқоғига ботганди, дейди Ҳамид Содиқ.
— Университетлар сони ортгани таълим ёки кадрлар сифатини тушириб юбормайдими?
— Аслида университет омма учун мўлжалланмаган, унда кам сонли, энг иқтидорли талабалар таҳсил олган. Олий таълим оммалашар экан, унинг сифати ўз-ўзидан тушиб боради. Ўзим ҳам олий таълимда дарс берганман ва талабанинг кўплиги педагогларнинг ҳам профессионаллигини ҳам тушириб юборади. Тан олиш керак, аввалги таълимда коррупция бор эди, ҳозир эса буни учратмаймиз. Аммо хусусийлар давлат университетлардаги профессор-устозларни ўзига жалб қилди. Натижада улар ўрнини ёш ва тажрибасиз профессор-устозлар эгаллаяпти. Ахборот майдонининг очилиши сабаб одамлар таълим сифати ҳақида ўз фикрларини айтоляпти, дейди Ҳамида Содиқ.
“Ракурс”нинг янги сонини тўлиқ ҳолда қуйидаги ҳавола орқали томоша қилишни тавсия қиламиз.
Изоҳ (0)