БМТ Исроилни замонавий тарихдаги “энг мудҳиш геноцид” содир этганликда айбламоқда. Бу ҳақда Anadolu хабар берди.
БМТнинг босиб олинган Фаластин ҳудудларида инсон ҳуқуқлари бўйича махсус маърузачиси Франческа Альбанесе эксклавдаги гуманитар вазиятни апокалипсисга қиёслади.
“Исроилнинг фаластинликларга қарши ҳаракатлари замонавий тарихдаги энг шафқатсиз геноцидлардан бири”, деди Альбанесе.
БМТнинг Инсон ҳуқуқлари бўйича кенгашида сўзга чиққан Альбанесе ўзининг “Мустамлака иқтисодиётидан геноцид иқтисодиётига” номли маърузасини тақдим этган. Унда Исроил истилосининг иқтисодий жиҳатлари кўриб чиқилган. Шунингдек. Исроилга фаластинликларни мажбурий кўчириш, уларни изоляция ва тўлиқ назорат қилиш имконини берган иқтисодий шароитлар санаб ўтилган.
Альбанесега кўра, Исроил ва АҚШ кўмагида ташкил этилган Ғазо гуманитар жамғармасининг ёрдами “ўлим тузоғи”дан бошқа нарса эмас.
“Бу жамғарма ёрдам бериш сифатида эмас, балки ўлимга ёки қочишга мажбурлаш воситаси сифатида ишлаб чиқилган. У одамларни бутунлай йўқ бўлиб кетиш даражасига олиб келишга мўлжалланган”, деди Альбанесе.
У расмий маълумотларга таяниб, Ғазода 200 мингдан ортиқ одам ҳалок бўлгани ёки яраланганини қўшимча қилган. Шунингдек, босиб олинган Ғарбий Соҳилда фаластинликлар “1967 йилдан бери энг катта мажбурий кўчишни бошдан кечираётгани” таъкидланган. Альбанесе дунёнинг барча давлатларини Исроил ҳарбий сектори билан ҳамкорликни узишга чақирган.
Изоҳ (0)