Тадбиркорга 262 млн сўм асоссиз ва ноқонуний жарима қўллашнинг олди олинди, деб хабар бермоқда Бизнес омбудсман ахборот хизмати.
Келтирилишича, Украинадаги ҳамкорлар билан тузилган ташқи савдо шартномалари бўйича муддати ўтган дебитор қарздорлик юзага келган. Қашқадарё вилояти солиқ бошқармаси ушбу қарздорлик енгиб бўлмас куч (форс-мажор) таъсирида юзага келганини инобатга олмасдан, фермер хўжалигига 262 миллион сўм (қарздорликнинг 10 фоизи) миқдорида жарима қўллаш тўғрисида Қарши туманлараро иқтисодий судига ариза билан мурожаат қилган.
“Валютани тартибга солиш тўғрисида”ги қонун 11-1-моддасига кўра, норезидентга тўлов ёки экспорт амалга оширилган санадан эътиборан 180 кун ўтганидан кейин кўпи билан 45 кунда (кичик тадбиркорлик субъектлари учун 90 кунда) ташқи савдо операциялари бўйича активларни репатриация қилишни таъминламаган резидентлар республика бюджети даромадига активларни репатриация қилиш норезидентга тўлов ёки экспорт амалга оширилган санадан эътиборан 360 кундан 545 кунгача кечикканда — репатриация қилинмаган активлар суммасининг 10 фоизига тенг миқдорда қўшимча равишда жарима тўлайди.
Енгиб бўлмас куч таъсири юзага келганда активларни репатриация қилиш муддати енгиб бўлмас кучнинг таъсир муддатига узайтирилади. Енгиб бўлмас куч таъсири ҳолатлари юз бергани ушбу ҳодиса ўзида содир бўлган давлатнинг қонунчилигига мувофиқ ваколатли орган томонидан тасдиқланади.
“Украина Савдо-саноат палатаси тўғрисида”ги қонуннинг 14-1-моддасига кўра, Савдо-саноат палатаси форс-мажор ҳолатларини белгиловчи ваколатли давлат органи ҳисобланади. Украина ССПнинг расмий сайтида 2022 йил 28 февралда жойлаштирилган расмий хатга кўра, 2022 йил 24 февралда бошланган ҳарбий ҳаракатлар туфайли шартнома мажбуриятларини бажара олмаслик форс-мажор ҳолати ҳисобланади.
Суд мажлисида бизнес-омбудсман томонидан тақдим этилган ҳужжатлар ва ҳуқуқий асослар инобатга олиниб, солиқ бошқармасининг аризаси қаноатлантирилмади. Натижада тадбиркорга нисбатан 262 миллион сўм жарима қўлланишининг олди олинди.
Изоҳ (0)