Фазлиддин Баҳромов Тошкент шаҳар транспорт ва йўл транспорт инфратузилмасини ривожлантириш бош бошқармаси бошлиғи этиб тайинланди. Бу ҳақда Транспорт бошқармаси матбуот хизмати хабар берди.
Фазлиддин Баҳромов 1991 йил 14 августда Тошкент шаҳрида туғилган. 2016 йилда Тошкент шаҳридаги Сингапур менежментни ривожлантириш институти Ишлаб чиқаришни бошқариш менежменти факультетининг бакалавр босқичини, 2018 йилда молия иши йўналишида магистратура босқичини, 2020 йилда эса “Эл-юрт умиди” жамғармаси стипендиати сифатида АҚШнинг Вебстер университети Тошкент филиали Лойиҳа бошқаруви факультетининг магистратура босқичини тамомлаган.
Тайинловга қадар у Ўзбекистон президенти ҳузуридаги Стратегик ислоҳотлар агентлиги Delivery Unit лойиҳа офиси мутахассиси лавозимида ҳамда Ёшлар ишлари агентлигининг марказий аппаратида бошқарма бошлиғи лавозимларида фаолият юритган.
Эслатиб ўтамиз, 2024 йилнинг февраль ойида пойтахт транспорт бошқармаси ва “Тошшаҳартрансхизмат” бошлиғи лавозимида ишлаб келган Анвар Жўраев қамоққа олинган эди. У Жиноят кодексининг 167-моддаси 3-қисми “а” банди (жуда кўп миқдорда ўзлаштириш ёки растрата йўли билан талон-торож қилиш) ва 209-моддаси 2-қисми “а” бандида (такроран мансаб сохтакорлиги) назарда тутилган жиноятларни содир этганликда гумон қилинмоқда.
Изоҳ (0)