Fazliddin Bahromov Toshkent shahar transport va yo‘l transport infratuzilmasini rivojlantirish bosh boshqarmasi boshlig‘i etib tayinlandi. Bu haqda Transport boshqarmasi matbuot xizmati xabar berdi.
Fazliddin Bahromov 1991-yil 14-avgustda Toshkent shahrida tug‘ilgan. 2016-yilda Toshkent shahridagi Singapur menejmentni rivojlantirish instituti Ishlab chiqarishni boshqarish menejmenti fakultetining bakalavr bosqichini, 2018-yilda moliya ishi yo‘nalishida magistratura bosqichini, 2020-yilda esa “El-yurt umidi” jamg‘armasi stipendiati sifatida AQSHning Vebster universiteti Toshkent filiali Loyiha boshqaruvi fakultetining magistratura bosqichini tamomlagan.
Tayinlovga qadar u O‘zbekiston prezidenti huzuridagi Strategik islohotlar agentligi Delivery Unit loyiha ofisi mutaxassisi lavozimida hamda Yoshlar ishlari agentligining markaziy apparatida boshqarma boshlig‘i lavozimlarida faoliyat yuritgan.
Eslatib o‘tamiz, 2024-yilning fevral oyida poytaxt transport boshqarmasi va “Toshshahartransxizmat” boshlig‘i lavozimida ishlab kelgan Anvar Jo‘rayev qamoqqa olingan edi. U Jinoyat kodeksining 167-moddasi 3-qismi “a” bandi (juda ko‘p miqdorda o‘zlashtirish yoki rastrata yo‘li bilan talon-toroj qilish) va 209-moddasi 2-qismi “a” bandida (takroran mansab soxtakorligi) nazarda tutilgan jinoyatlarni sodir etganlikda gumon qilinmoqda.
Izoh (0)