Ўзбекистонда ўтган тўрт ойда 6 329 нафар эгизак туғилгани маълум қилинди.
Статистика агентлигининг дастлабки маълумотларига кўра, Ўзбекистонда 2024 йилнинг январь—апрель ойларида тирик туғилган эгизаклар сони 6 329 нафарни ташкил этган. Шундан:
- ўғил болалар — 3 209 нафар;
- қиз болалар — 3 120 нафарни ташкил этган.
1 апрелда Ўзбекистоннинг доимий аҳолиси сони 36 миллион 963 минг кишидан ошгани маълум қилинди. Шундан эркаклар 18,6 миллион, аёллар сони 18,3 миллион нафар.
Аҳолининг ёш гуруҳи
2024 йил 1 январь ҳолатига Ўзбекистонда 5 ёшгача бўлган гўдаклар сони 4,4 миллион нафар, 5–13 ёшдаги болалар 6,1 миллион нафар, 14–30 ёшлар оралиғидаги ёшлар сони 9,6 миллион нафарни ташкил этган. Мамлакатда 31–59 ёшли ўрта ёшдагилар энг кўп — 13,2 миллион киши, 60 ва ундан катта ёшдаги кексалар сони 3,5 миллион нафарга яқинлашган.
Аҳолининг ёш гуруҳи — умумий ёши ва бошқа хусусиятлари билан бирлаштирилган инсонлар гуруҳидир.
Доимий аҳолиси таркиби жинси ва ёш гуруҳлари бўйича таҳлил қилинганда, эркаклар гуруҳида 4 ёшгача бўлган болалар (2,3 миллион киши) энг кўп, 60–64 ёшлилар энг кам (657 минг киши) бўлиб чиққан. Аёллар таркибида ҳам сон жиҳатдан 4 ёшгача бўлган қизлар (2,1 миллион киши) энг юқори, 60–64 ёшлилар (736 минг киши) энг паст кўрсаткични қайд этган.
Аҳолининг меҳнатга лаёқатли ёш бўйича тақсимланиши
Таҳлилларга кўра, республикада жами аҳолининг 56,4 фоизи меҳнатга лаёқатли ёшда, 32 фоизи меҳнатга лаёқатли ёшдан кичик, 11,6 фоизи меҳнатга лаёқатли ёшдан каттадир. Шундан эркакларнинг меҳнатга лаёқатли ёшдан кичиклари 33 фоиз, меҳнатга лаёқатли ёшдагилари 58,5 фоиз, меҳнатга лаёқатли ёшдан катталари 8,5 фоиз бўлган. Аёллардан 31 фоизи меҳнатга лаёқатли ёшдан кичик, 54,2 фоизи меҳнатга лаёқатли ёшда, 14,8 фоизи меҳнатга лаёқатли ёшдан катталар ҳиссасига тўғри келган.
Аҳолининг ўртача ёши
Сўнги 20 йил ичида Ўзбекистон аҳолисининг ўртача ёши кўтарилиб бормоқда. Хусусан, жорий йил бошида (1 январь) мамлакат аҳолисининг ўртача ёши эркакларда 28,5 ёшни, аёлларда 30 ёшни ташкил этган. Ўн йил илгари (2014 йилда) эркакларнинг ўртача ёши 27,3 ёш, аёлларники 28,6 ёш бўлган. 2004 йилда эса эркакларда 24,8 ёш ўртача, аёлларда 26,1 ёш ўртача ёш чегараси ҳисобланган.
Республикада 2023 йилда аҳолининг туғилишда кутилаётган умр давомийлиги 74,7 ёшни ташкил этган. Бу кўрсаткич туғилган (0 ёшдаги) инсонларнинг кутилаётган ўртача умр кўриш йиллари қанчалигини англатади.
Мамлакатда январь–март ойларида 205 700 чақалоқ (2023 йил мос давридан 4,3 фоиз кам) тирик туғилган. Энг кўп туғилиш Самарқанд вилоятида (24 075 нафар), энг ками эса Сирдарё вилоятида (5 066 нафар) қайд этилган. Ҳудудлар бўйича туғилиш коэффициенти энг юқори кўрсаткич Сурхондарёда, энг кам ўсиш Бухорода кузатилган.
Изоҳ (0)