Олий суд раисининг биринчи ўринбосари Робахон Маҳмудова лавозимидан озод этилди. Бу ҳақда Олий Мажлис Сенатининг қирқ тўққизинчи ялпи мажлисида маълум қилинди.
Робахон Маҳмудова бошқа ишга ўтиши муносабати билан Олий суд раисининг биринчи ўринбосари лавозимидан озод этилди. Бу ҳақдаги президент тақдимномаси сенаторлар томонидан маъқулланди.
У Олий суд раисининг биринчи ўринбосари — жиноят ишлари бўйича судлов ҳайъати раиси лавозимида 2020 йилнинг июлидан буён ишлаб келаётганди. Сенат қарорига кўра, Робахон Маҳмудова 10 йил муддатга Олий суд раисининг биринчи ўринбосари лавозимига сайланиб, Сенатнинг Фан, таълим, соғлиқни сақлаш масалалари қўмитаси раиси лавозимидан озод этилганди.
Робахон Маҳмудова 1968 йили Фарғонада туғилган. У меҳнат фаолиятини қуйи судлардан бошлаб, Олий суд судьясигача бўлган йўлни босиб ўтган, Жиноят ишлари бўйича Фарғона вилояти суди раиси вазифасида ишлаган. 2020 йил январигача Фарғона вилояти Халқ қабулхонаси мудири лавозимида фаолият кўрсатган.
2020 йилнинг январида Фарғона вилоятидан сенатор этиб сайланган, кейинроқ Ўзбекистон Сенатининг Фан, таълим, соғлиқни сақлаш масалалари қўмитаси раиси лавозимига сайланганди. 2020 йил март ойида “Фидокорона меҳнатлари учун” ордени билан тақдирланган.
У 2023 йилда “Адолат” социал-демократик партиясидан президентликка номзод сифатида сайловда иштирок этганди.
Изоҳ (0)