Сурхондарёнинг Денов ва Қизириқ туманлари собиқ ҳокими 8 йил 6 ой муддатга озодликдан маҳрум қилинди. Бу ҳақда Олий суд ахборот хизмати хабар берди.
Маълум қилинишича, Жиноят ишлари бўйича Олтинсой туман судининг 2023 йил 4 сентябрдаги ҳукмига мувофиқ Б.Худойберганов (1976 йилда Сурхондарё вилоятида, Шўрчи тумани ҳокими лавозимида ишлаган) Жиноят кодексининг 167-моддаси (ўзлаштириш ёки растрата йўли билан талон-торож қилиш) 2-қисми “а”, “в”, “г” бандлари, 184-1-моддаси (бюджет ва смета-штат интизомини бузиш) 2-қисми, 209-моддаси (мансаб сохтакорлиги) 2-қисми “а” банди ва 229-4-моддаси (ер бериш тартибини бузиш) 2-қисми “а”, “б” бандларида назарда тутилган жиноятларни содир этганликда айбдор деб топилиб, унга 2 йил муддатга давлат иштирокидаги корхона, муассаса ва ташкилотларда ишлаш ҳуқуқидан маҳрум қилган ҳолда 4 йил муддатга озодликни чеклаш жазоси тайинланган.
Сурхондарё вилоят суди жиноят ишлари бўйича судлов ҳайъати аппеляция инстанциясининг 2023 йил 7 ноябрдаги ажрими билан биринчи инстанция суди ҳукмининг Б.Худойбергановга оид қисми ўзгаришсиз қолдирилди.
Жиноят ишлари бўйича Термиз туман судининг 2023 йил 7 декабрдаги ҳукмига мувофиқ Р.Пардаев (1979 йилда Сурхондарё вилоятида туғилган, Денов ва Қизириқ туманлари ҳокими лавозимларида ишлаган) Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми “а” банди, 168-моддаси (фирибгарлик) 4-қисми “а” банди, 205-моддаси (ҳокимият ёки мансаб ваколатини суиистеъмол қилиш) 2-қисми “а” банди ва 209-моддаси (мансаб сохтакорлиги) 2-қисми “а” бандида назарда тутилган жиноятларни содир этганликда айбдор деб топилиб, унга 2 йил 6 ой муддатга давлат органи, давлат иштирокидаги ташкилотларда мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилган ҳолда, 8 йил 6 ой муддатга озодликдан маҳрум қилиш жазоси тайинланган.
Ҳозирги кунда Р.Пардаев ва унинг ҳимоячилари томонидан биринчи инстанция судининг ҳукми устидан апеллясия тартибида берилган шикояти Сурхондарё вилоят суди жиноят ишлари бўйича судлов ҳайъати апеллясия инстанциясида кўриш учун расмийлаштирилмоқда.
Изоҳ (0)