Сирдарё вилояти Гулистон шаҳрида 10 кун аввал бедарак йўқолган аёлнинг жасади каналдан топилди. Бу ҳақда “Дарё”га Бош прокуратура матбуот котиби Ҳаёт Шамсутдинов хабар берди.
Маълум бўлишича, Гулистон шаҳрида фуқаро М.Н. ИИБга ариза билан мурожаат қилиб, 1974 йилда туғилган синглиси А.С. 12 ноябрь куни хонадонидан номаълум томонга чиқиб кетиб, қайтиб келмаганини билдирган.
22 ноябрь куни фуқаро З.Х. шаҳар ИИБ навбатчилик қисмига қўнғироқ қилиб, Гулистон шаҳар ҳудудидан оқиб ўтувчи Дўстлик каналида аёл мурдасини кўрганини айтган. Текширув давомида А.С.нинг мурдасини таниб олиш учун амакисига кўрсатилганда, амакиси аёлнинг кийим-кечакларидан, қош-кўзларидан ва қорин соҳасидаги чандиғидан таниб олган.
Аёлнинг мурдаси кўздан кечирилганда тан жароҳатлари йўқлиги маълум бўлган ва мазкур ҳолат юзасидан судга оид тиббий экспертиза тайинланган.
Айни пайтда ҳолат юзасидан шаҳар прокуратураси томонидан терговга қадар текшириш ҳаракатлари олиб борилмоқда.
Изоҳ (0)