Сиан шаҳрида бўлиб ўтаётган Хитой—Марказий Осиё биринчи саммити шарафига ташкил этилган бизнес-форум доирасида “Асакабанк” АЖ ва Хитойнинг Sinosure экспорт-кредит агентлиги ўртасида икки давлат ўртасидаги савдо-сотиқни қўллаб-қувватлаш мақсадида 100,0 миллион доллари миқдорида ҳамкорлик келишуви имзоланди.
Мазкур келишув “Асакабанк” ва Sinosure ўртасидаги 2017 йилдан бошланган муваффақиятли ва самарали ҳамкорликнинг давоми бўлди. Ўтган давр мобайнида умумий қиймати 128,8 миллион долларлик иккита йирик лойиҳа биргаликда амалга оширилди.
Таъкидлаш лозимки, “Асакабанк” Ўзбекистонда биринчилардан бўлиб Sinosure суғурта қопламаси остида лойиҳаларни амалга оширган.
Сиан шаҳрида имзоланган келишув бозорда ўхшаши бўлмаган бу турдаги биринчи ҳужжат бўлиб, икки молия институтлари ўртасидаги ҳамкорликни мутлақо янги босқичга кўтаради. Шундай қилиб, имзоланган келишув “Асакабанк” учун қуйидаги имкониятларни яратади:
Нафақат узоқ муддатли лойиҳаларни молиялаштириш учун Sinosure суғурта қопламасини жалб қилиш, балки унинг қисқа муддатли маблағларидан фойдаланган ҳолда хитой таркибига эга лойиҳаларни молиялаштириш.
Хитой билан савдо айланмасини амалга оширувчи кичик ва ўрта бизнес вакилларининг операцияларини экспорт қилувчининг ҳисоб рақамига маблағларни тўғридан тўғри ўтказиш имконияти билан молиялаштириш.
АҚШ долларида ҳам, Хитой юанида ҳам молиявий операциялар амалга оширилади, бу маблағларни конвертация қилишда валюта харажатларидан қисқартириш, валюта рискларини диверсификация қилиш, шунингдек, кичик ва ўрта бизнес вакиллари томонидан тўловларни амалга оширганда қулайлик яратиш имконини беради.
Келишувлар доирасида томонлар “Асакабанк” АЖ ва Sinosure ходимлари ўртасида тажриба алмашиш учун мунтазам тренинглар ўтказишга ҳам келишиб олдилар.
Маълумот учун
China Export & Credit Insurance Corporation (Sinosure) Хитойнинг экспорт кредитларини суғурталовчи корпорацияси бўлиб, “Бир макон, бир йўл” дастурининг бир қисмидир. Sinosure 2001 йилда Хитой Халқ суғурта компаниясининг (PICC) экспорт кредитлари бўлими ва Хитой Экспорт-импорт банкининг суғурта бўлимини бирлаштириш орқали ташкил этилган. Фаолиятининг асосий йўналишлари экспорт кредитларини ўрта ва узоқ муддатли суғурталаш, хорижий инвестицияларни суғурталаш, қисқа муддатли экспорт кредитларини суғурталаш ва бошқалар. Лондон, Дубай, Москва, Йоханнесбург, Сан-Пауло, Жакарта ва Қоҳирада вакиллик офислари бор.
Реклама ҳуқуқи асосида.
Изоҳ (0)