“Ўзбекинвест” маҳаллий экспортчиларга ахборот кўмагини беришда фаол давом этмоқда

Ўзбекистон Республикаси Президентининг “Экспорт фаолиятини молиялаштириш ва суғурта ҳимояси механизмларини кенгайтириш чора-тадбирлари тўғрисида”ги қарорига мувофиқ, шунингдек, Ўзбекистон Республикаси Экспортни қўллаб-қувватлаш миллий тизими доирасида экспорт шартномалари ва кредитларини сиёсий ва тижорат рискларидан суғурталаш “Ўзбекинвест” компанияси томонидан амалга оширилиб келинмоқда.

Маҳаллий экспортчиларни қўллаб-қувватлаш бўйича топшириқларни амалга ошириш доирасида 2023 йил 1 чораги якунига кўра “Ўзбекинвест” компанияси ўз зиммасига 511,8 млн АҚШ долларидан ортиқ суғурта мажбуриятларини олди, бу эса нохом ашё экспорт қопламасининг 34 фоизини ташкил этди. 2022 йилнинг биринчи чорагида эса ушбу кўрсаткич 427,5 млн долларни ташкил қилган.

Фоиз миқдорида 2023 йилнинг биринчи чорагида суғурта ҳимояси ҳажмининг ўсиши 2022 йилнинг шу даврига нисбатан 120% ни ташкил этди.
2022 йил давомида экспортни комплекс суғурталаш бўйича суғурта ҳодисалари юз берганлиги муносабати билан миллий экспортчиларга 1,1 млрд сўм суғурта товонлари тўлаб берилди.

Ўзбекистон Республикаси Президентининг 2018 йил 20 декабрдаги “Экспортга кўмаклашиш ва уни рағбатлантиришни кучайтириш чора-тадбирлари тўғрисида”ги қарорида белгиланган вазифалар ижросини таъминлаш мақсадида “Ўзбекинвест” компанияси томонидан тадбиркорлик субъектлари ва экспорт фаолиятини амалга оширувчи корхоналар учун мунтазам равишда ўқув семинарлари ва тренинглар ўтказилиб келинмоқда.
Жумладан, жорий йил бошидан буён республиканинг 6 та вилояти: Жиззах, Сирдарё, Бухоро, Навоий, Хоразм ва Қорақалпоғистон Республикасида компания ходимлари томонидан маҳаллий экспортёр ва тадбиркорлар билан учрашувлар ўтказилиб, семинар-тренинглар ташкил этилди.

Семинарлар давомида суғуртанинг афзалликлари ҳамда ташқи бозорларда экспортчилар дуч келаётган қалтисликлардан ҳимояланиш йўллари, компания томонидан янги ишлаб чиқилган суғурта маҳсулотларини оммалаштириш ва амалиётга жорий этиш ишлари ҳақида тарғибот-ташвиқот ишлари олиб борилди.

Музокаралар якунида экспортчиларга фаолиятини кенгайтириш бўйича таклиф ва тавсиялар берилди.

Жорий йилда компания томонидан миллий маҳсулот ва хизматлар экспортини қўллаб-қувватлаш, экспортчилар географиясини, суғурта ҳимоясини янада кенгайтириш бўйича кенг кўламли ишларни давом эттириш режалаштирилган.

Реклама ҳуқуқи асосида.