O‘zbekiston Respublikasi Prezidentining “Eksport faoliyatini moliyalashtirish va sug‘urta himoyasi mexanizmlarini kengaytirish chora-tadbirlari to‘g‘risida”gi qaroriga muvofiq, shuningdek, O‘zbekiston Respublikasi Eksportni qo‘llab-quvvatlash milliy tizimi doirasida eksport shartnomalari va kreditlarini siyosiy va tijorat risklaridan sug‘urtalash “O‘zbekinvest” kompaniyasi tomonidan amalga oshirilib kelinmoqda.
Mahalliy eksportchilarni qo‘llab-quvvatlash bo‘yicha topshiriqlarni amalga oshirish doirasida 2023-yil 1 choragi yakuniga ko‘ra “O‘zbekinvest” kompaniyasi o‘z zimmasiga 511,8 mln AQSH dollaridan ortiq sug‘urta majburiyatlarini oldi, bu esa noxomashyo eksport qoplamasining 34 foizini tashkil etdi. 2022-yilning birinchi choragida esa ushbu ko‘rsatkich 427,5 mln dollarni tashkil qilgan.
Foiz miqdorida 2023-yilning birinchi choragida sug‘urta himoyasi hajmining o‘sishi 2022-yilning shu davriga nisbatan 120% ni tashkil etdi.
2022 yil davomida eksportni kompleks sug‘urtalash bo‘yicha sug‘urta hodisalari yuz berganligi munosabati bilan milliy eksportchilarga 1,1 mlrd so‘m sug‘urta tovonlari to‘lab berildi.
O‘zbekiston Respublikasi Prezidentining 2018-yil 20-dekabrdagi “Eksportga ko‘maklashish va uni rag‘batlantirishni kuchaytirish chora-tadbirlari to‘g‘risida”gi qarorida belgilangan vazifalar ijrosini ta’minlash maqsadida “O‘zbekinvest” kompaniyasi tomonidan tadbirkorlik sub’yektlari va eksport faoliyatini amalga oshiruvchi korxonalar uchun muntazam ravishda o‘quv seminarlari va treninglar o‘tkazilib kelinmoqda.
Jumladan, joriy yil boshidan buyon respublikaning 6 ta viloyati: Jizzax, Sirdaryo, Buxoro, Navoiy, Xorazm va Qoraqalpog‘iston Respublikasida kompaniya xodimlari tomonidan mahalliy eksportyor va tadbirkorlar bilan uchrashuvlar o‘tkazilib, seminar-treninglar tashkil etildi.
Seminarlar davomida sug‘urtaning afzalliklari hamda tashqi bozorlarda eksportchilar duch kelayotgan qaltisliklardan himoyalanish yo‘llari, kompaniya tomonidan yangi ishlab chiqilgan sug‘urta mahsulotlarini ommalashtirish va amaliyotga joriy etish ishlari haqida targ‘ibot-tashviqot ishlari olib borildi.
Muzokaralar yakunida eksportchilarga faoliyatini kengaytirish bo‘yicha taklif va tavsiyalar berildi.
Joriy yilda kompaniya tomonidan milliy mahsulot va xizmatlar eksportini qo‘llab-quvvatlash, eksportchilar geografiyasini, sug‘urta himoyasini yanada kengaytirish bo‘yicha keng ko‘lamli ishlarni davom ettirish rejalashtirilgan.
Reklama huquqi asosida.
Izoh (0)