АҚШ Эрондан Россияга қурол етказиб берилишига чек қўйиш устида ишлаётганини маълум қилди
Эрон ядровий келишувни қайта тиклашга қизиқмаяпти, АҚШ эса бошқа масалаларга, жумладан Эроннинг Россияга қурол-яроғ етказиб беришини тўхтатишга эътибор қаратмоқда, деди АҚШ маъмуриятининг Эрон бўйича махсус вакили Роберт Малли Bloombergа агентилигига.
«Ҳозирда биз Россияга қурол-яроғ етказиб беришни тийиш ва тўхтатиш, Эрон халқининг асосий интилишларини қўллаб-қувватлашга уриниш орқали ўзгаришлар қилишимиз мумкин», — деди у.
Ядровий келишув бўйича музокаралар ҳақида гапирар экан, Малли Вашингтон бу мавзуга эътибор қаратиш учун ҳеч қандай сабаб кўрмаётганини таъкидлади, чунки, унинг сўзларига кўра, Теҳрон қабул қилиб бўлмайдиган талабларни илгари сурмоқда, АҚШ эса «улар билан ўйнаш учун орқага қайтишни» истамайди.
Август ойида The Washington Post газетаси Россияга Эрон дронлари етказиб берилаётгани ҳақида ёзганди. Бунгача, июль ойида АҚШ маъмурияти Теҳроннинг Москвага бир неча юзлаб учувчисиз учоқларни, жумладан, қурол олиб юришга қодир дронларни топшириш режалари ҳақида маълумотга эга эканини билдирган.
Маълумотларга кўра, Россия Украинадаги урушда Эронда ишлаб чиқарилган Shahed-131 ва Shahed-136 дронларидан фойдаланмоқда, Россия Қуролли кучлари уларнинг номини «Геран-1» ва «Геран-2» деб ўзгартириб олган. Россия расмийлари дронларнинг Эрондан олиб келинишини тан олмаяпти.
Ноябрь ойи бошида Эрон ташқи ишлар вазири Ҳусайн Абдуллоҳиан Россияга бир қанча дронлар юборилганини тасдиқлаб, бу уруш бошланишидан бир неча ой олдин содир бўлганини айтди.
Эрон ядро дастури бўйича Қўшма кенг қамровли ҳаракатлар режаси 2015 йилда Россия, АҚШ, Франция, Буюк Британия, Хитой ва Эрон иштирокида тузилган. Унда ядровий дастурни чеклаш эвазига Теҳронга қарши санкциялар бекор қилиниши ва Эрон томонининг ядровий қурол ишлаб чиқмаслик кафолати кўзда тутилган.
Дональд Трамп президентлиги даврида Қўшма Штатлар ядровий келишувдан чиқиб, санкцияларни қайта жорий қилди, Теҳрон эса келишув бўйича ўз мажбуриятларидан қайтишни бошлади. 2021 йилда АҚШ президенти Жо Байден келишувга қайтишга тайёрлигини билдирди. 2022 йил августида Эрон Қўшма Штатларни ушбу мавзу бўйича музокараларни чўзаётганликда айблади, сентябрда эса АҚШ Давлат котиби Энтони Блинкен Эрон билан келишувга эриша олмаслигини айтди.
