Саудия Арабистони Тошкентда Ал-Ҳабиб тиббиёт академиясини ташкил этмоқчи
Инвестициялар ва ташқи савдо вазири Жамшид Хўжаев Саудия Арабистони инвестициялар вазири Холид ал-Фалиҳ билан видеоконференцалоқа воситасида учрашув ўтказди, деб хабар бермоқда ИTСВ.
Қайд этилишича, энергетика соҳасида сармоявий ҳамкорликнинг амалий жиҳатлари муҳокама қилинган. Ҳозирда ACWA Power компанияси умумий қиймати 4 миллиард доллардан ортиқ ва қуввати 4,1 ГВт дан ортиқ бўлган 5 та лойиҳани амалга оширмоқда. Лойиҳаларни жорий этишни жадаллаштириш бўйича аниқ чора-тадбирлар кўриш, шунингдек, қайта тикланадиган ва водород энергетикасини ривожлантиришни ўз ичига олган 10 миллиард долларлик янги инвестиция дастурини ишлаб чиқишни маромига етказиш бўйича келишувга эришилган.
1 миллиард 310 миллион долларлик MTP технологияси асосида метанолдан пропилен ишлаб чиқаришни ташкил этишни назарда тутган ҳолда кимё тармоғида инвестиция лойиҳаларини амалга ошириш бўйича ишларнинг бориши кўриб чиқилган. Жорий йилнинг декабрь ойида лойиҳанинг техник ва технологик параметрларини ишлаб чиқишни жадаллаштириш мақсадида Саудия Арабистони компаниялари делегациясининг Ўзбекистонга сафари режалаштирилган.
Томонлар, шунингдек, Тошкент шаҳри ва Тошкент вилоятидаги 5 та шифохонани реконструкция қилиш, Ал-Ҳабиб тиббиёт академиясини ташкил этиш ва фармацевтика ишлаб чиқаришини йўлга қўйиш юзасидан фикр алмашган. Саудия томони барча тайёргарлик жараёнларини амалга ошириш ва лойиҳа ҳужжатларини шакллантиришни тезлаштириш мақсадида мутахассислар гуруҳини юборишга тайёрлигини билдирган.
Мулоқот чоғида қишлоқ хўжалиги соҳасидаги лойиҳаларни биргаликда амалга ошириш истиқболлари ҳам кўриб чиқилган. Иқлим шароити ва тупроқ сифатини ўрганиш бўйича чора-тадбирлар келишиб олинган. Таҳлил натижаларига кўра, Навоий ва Тошкент вилоятларида 1,8 минг гектардан ортиқ майдонда Ал Ражҳи International ва Ajlan & Брос компаниялари мутахассислари томонидан ишлар бошланади.
Томонлар Саудия Арабистони Давлат инвестиция жамғармаси билан Ўзбекистон Тикланиш ва тараққиёт жамғармаси ўртасида қўшма инвестиция лойиҳаларини биргаликда молиялаштириш тўғрисида битим тузиш, шунингдек, Саудия Арабистони Давлат инвестиция жамғармаси кўмагида Ўзбекистонда Индекс акциялари жамғармасини ташкил этиш истиқболларини муҳокама қилган.
