ИШИД етакчиси қамалга олингач, ўзини портлатиб юборган — Reuters
ИШИД етакчиси Абу ал-Ҳасан ал-Ҳошимий ал-Қурайиший Суриянинг Жасим шаҳрида жангарилар билан кураш чоғида қуршовга тушиб қолгач, ўзини тарафдорлари билан бирга портлатиб юборган. Бу октябрь ўрталарида юз берган, деб ёзади Reuters ўз манбаларига таяниб.
Агентлик манбаларига кўра, Абу ал-Ҳасан ал-Ҳошимий ал-Қурайиший махфий уйлардан бирида сақланаётганида қамалга олинган. Уни топиб олишгач, тарафдорлари билан бирга худкушлик камарларини портлатган. ИШИД ячейкасини қуршовга олган жангарилар қайси гуруҳга тегишли бўлганига агентлик манбалари аниқлик киритмаган.
Аввалроқ ИШИД ўз етакчиси Абу ал-Ҳасан ал-Ҳошимий ал-Қурайиший Ироқдаги жанг чоғида ҳалок бўлганини маълум қилганди. Пентагон даъво қилишича, уни «Сурия озод армияси» йўқ қилган.
Ал-Ҳасаннинг ўлими ҳақида 30 ноябрь куни кечқурун ИШИД вакилига таяниб Reuters хабар берганди. Унинг ўрнини Абу ал-Ҳусайн ал-Ҳусайний ал-Қурайший эгаллаган.
Ал-Ҳасан 2021 йилнинг февраль ойида террор ташкилотнинг сўнгги раҳбари Абу Иброҳим ал-Ҳошимий ал-Қурайишининг ўлимидан сўнг ИШИДга раҳбарлик қилган. Ал-Ҳошимий АҚШ ҳарбийлари томонидан Сурия шимоли-ғарбида ўтказилган махсус операция давомида йўқ қилинганди.
«Ал-Арабия» нашрининг ёзишича, Абу ал-Ҳасан ал-Ҳошимий Сурия ва Ироқдаги ИШИД назорати остидаги ҳудудларда таълим билан шуғуллангани учун «ИШИД профессори» лақабини олган. Reuters агентлиги Ироқ ва Ғарб хавфсизлик хизматларидаги манбаларга таяниб, ал-Ҳасан 2019 йилда ўлдирилган ИШИД етакчиси Абу Бакр ал-Бағдодийнинг укаси эканини маълум қилди.
«Сурия озод армияси» 2011 йилнинг ёзида президент Башар Асад бошчилигидаги ҳукуматга қарши бўлган Сурия армияси офицерлари гуруҳи томонидан тузилган. Ҳозир ОСА кичик маҳаллий ташкилотлардан иборат ва ягона қўмондонлик марказига эга эмас. Коалиция АҚШ ва Саудия Арабистони томонидан қўллаб-қувватланади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
