Ташқи меҳнат миграцияси агентлиги Орловда ўзбекистонлик муҳожирларга урушга чақирув қоғозлари келганига муносабат билдирди
Россиянинг Орлов вилоятидаги чиқиндиларни қайта ишлаш корхонада ишлаётган Ўзбекистон фуқаролари сафарбарлик учун чақирув олганди. Ташқи меҳнат миграцияси агентлиги бунга муносабат билдирди.
Агентлик ахборотига кўра, Орлов вилоятида вақтинча меҳнат фаолиятини амалга ошираётган ўзбекистонлик меҳнат мигрантларини сафарбарликка жалб қилиш учун чақирувлар келгани ҳақида тарқалган хабарлар муносабати билан, Ўзбекистоннинг Москвадаги элчихонаси ва Ташқи меҳнат миграцияси агентлигининг Россиядаги ваколатхонаси вакилларидан иборат ишчи гуруҳ томонидан назоратга олинди ва ташкилот раҳбарияти ҳамда фуқаролар билан алоқа ўрнатилиб, воқеа жойига йўл олинди.
Ўрганишлар натижаси юзасидан қўшимча маълумот берилади.
«Шу муносабат билан Россиядаги ўзбекистонлик меҳнат мигрантларидан ҳарбий ҳаракатларга аралашмасликни, низоли ҳудудларга бормасликни ҳамда бундай ҳолатларга дуч келса, Ташқи меҳнат миграцияси агентлиги ва бошқа ваколатли ташкилотлага мурожаат қилишларини сўраймиз», — дейилади агентлик хабарида.
Ўзи нима гап?
Орловдаги «ЭкоСити» акциядорлик жамияти чиқиндиларни қайта ишлаш корхонаси ходимлари 25 октябрь, сешанба сафарбарлик учун чақирув олган. Муддатли ҳарбий хизматга чақирилганлар орасида 50 киши бўлиб, уларнинг ярми Ўзбекистон фуқаролари бўлган. Эртасига барча ишчилар ўз хизмат жойларига қайтарилган.
Кейинроқ Орлов ҳарбий комиссарлиги вазиятга изоҳ берган. Унга кўра, 25 октябрь куни «ЭкоСити» АЖ корхонасига 50 та чақирув қоғози юборилган. Комиссияга корхонанинг 26 нафар ходими етиб келган, улардан 23 нафари чет эл фуқаролари, «Б» тоифали фуқаро ва бир киши соғлиғидан шикоят қилган. Яна бир чақирув варақаси 27 октябрь куни ҳарбий комиссияга келган сана билан қайта расмийлаштирилган. Яъни, «ЭкоСити» ОАЖ ишчилари бўлган 27 нафар россияликдан фақат учтаси хизматга чақирилган. Хорижий фуқаролар ҳужжатлар текширилгандан сўнг қўйиб юборилган.
