Ўзбекистонда давлат бюджетидан 5 мингга яқин корхонага 12,7 трлн сўм ҚҚС қоплаб берилган

Ўзбекистонда 2022 йилнинг январь—сентябрь ойларида давлат бюджетидан қайтарилган ҚҚС (қўшилган қиймат солиғи) 12,7 трлн сўмдан ошди. Бу ҳақда Давлат солиқ қўмитаси хабар бермоқда.

Маълум бўлишича, жами 8 424 та ариза бўйича 4 833 корхонага 12,77 трлн сўм қоплаб берилган.

Қайтарилган ҚҚС бўйича ҳудудлар орасида Тошкент шаҳри етакчилик қилмоқда — 596 та корхонага 1,8 трлн сўм. Кейинги поғоналарда мос равишда Тошкент (651 млрд сўм) ва Андижон вилоятига (589,6 млрд сўм) тегишли бўлди. 

Бундан ташқари йирик солиқ тўловчилар бўйича Давлат солиқ инспекциясига 124 та корхона учун 7,4 трлн сўм қайтарилган.  

Соҳалар кесимида энг кўп қоплаб берилган ҚҚС ишлаб чиқарувчиларга бўлди — мингдан ошиқ корхонага 7,1 трлн сўм. 

Шунингдек: 

• чакана савдо — 1 390,6 млрд сўм (801 та корхона);
• улгуржи савдо — 946 млрд сўм (204 та корхона);
• қурилиш — 848 млрд сўм (112 та корхона);
• қишлоқ хўжалиги — 613 млрд сўм (2 020 та корхона);
• импорт қилувчилар — 549 млрд сўм (173 та корхона);
• бошқалар — 1 319,1 млрд сўм (404 та корхона).

Таъкидланишича, қоплаб берилган жами ҚҚС ўтган йилнинг мос даврига нисбатан 2,4 трлн сўмга кўп.