Ўзбекистонда айрим юридик шахсларни давлат рўйхатидан ўтказиш, тугатиш тартиблари белгиланди

Адлия вазирлиги ташаббуси асосида Вазирлар Маҳкамасининг «Тадбиркорлик субъектлари бўлмаган айрим юридик шахсларни ташкил этиш ва тугатишга доир норматив-ҳуқуқий ҳужжатларни тасдиқлаш тўғрисида»ги қарори қабул қилинди. Бу ҳақда Давлат хизматлари маркази хабар қилди.

Қайд этилишича, ушбу қарор билан:

• давлат органлари ва муассасаларини давлат рўйхатидан ўтказиш ва давлат органларини тугатиш бўйича давлат хизматини кўрсатишнинг маъмурий регламенти;
• юридик шахслар бирлашмаларини давлат рўйхатидан ўтказиш бўйича давлат хизматини кўрсатишнинг маъмурий регламенти;
• адвокатлик тузилмаларини давлат рўйхатидан ўтказиш бўйича давлат хизматини кўрсатишнинг маъмурий регламенти;
• уй-жой мулкдорлари ширкатларини давлат рўйхатидан ўтказиш бўйича давлат хизматини кўрсатишнинг маъмурий регламенти;
• тадбиркорлик субъектлари бўлмаган айрим юридик шахсларнинг давлат реестрини юритиш тартиби тўғрисидаги низом;
• тадбиркорлик субъектлари бўлмаган айрим юридик шахсларни тугатиш тартиби тўғрисидаги низом тасдиқланган.

Қарорга асосан икки ой муддатда давлат органлари, ташкилотлари ва муассасалари, шу жумладан бошқа давлат органлари ҳузурида ташкил этиладиган ташкилотлар ўзлари ҳақидаги маълумотларни (номи, почта манзили, ташкилий-ҳуқуқий шакли ва таъсис ҳужжатлари) Давлат хизматлари марказларига тақдим этади.

Адлия вазирлиги эндиликда давлат органлари, ташкилотлари ва муассасалари, шу жумладан, бошқа давлат органлари ҳузурида ташкил этиладиган ташкилотларни юридик шахс сифатида давлат рўйхатидан ўтказиб, уларнинг реестрини юритиб боради.