Кобулдаги таълим марказида имтиҳон вақтида портлаш юз берди, 32 киши ҳалок бўлди (видео)

Афғонистон пойтахтидаги «Каж» таълим марказида имтиҳон чоғида портлаш юз берди, деб хабар қилади Al Jazeera ҳукуматдаги манбасига таяниб. Кобул полицияси Холид Задран портлаш содир бўлганини тасдиқлади.

Телеканал маълумотларига кўра, таълим марказида худкуш террорчи томонидан теракт содир этилган, оқибатда 32 киши ҳалок бўлиб, яна 40 киши яраланган.

Ҳужум қилган шахс дастлаб қўриқчини отиб ташлаган, сўнг синфхонага кириб, ўқувчилар орасида ўз худкушлик камарини портлатган.

Таълим маркази шаҳарнинг ғарбий қисмидаги Дашти Барчи туманида жойлашган, у ерда асосан ҳазора шиалар яшайди.

Бу Кобулнинг ушбу туманидаги таълим марказлари ҳужумга учраши билан боғлиқ биринчи ҳолат эмас. Чунончи, апрель ойида бу тумандаги ўрта мактабга ҳужум оқибатида олти киши ҳалок бўлганди. 2021 йил майида қизлар мактабида бомба портлаши туфайли 85 киши қурбон бўлганди. 2020 йил майида эса жангарилар Дашти Барчидаги туғуруқхонада 24 нафар аёл ва болаларни ўлдирганди.

Афғонистонда ҳазора шиаларидан иборат озчилик тез-тез террорчилик ҳужумлари нишонига айланади ва ИШИД томонидан ҳам, «Толибон» томонидан ҳам таъқибларга учрайди.

23 сентябрь куни Кобулнинг дипломатик муассасалар ва ҳукумат бинолари жойлашган «яшил ҳудуди»да Вазир Акбар Хон масжидида портлаш юз берганди.