Озод Шукруллоевнинг «Халқлар дўстлиги» санъат саройида ўтказган илк stand up концертидан репортаж (фото, видео)
Ижтимоий тармоқлардаги ҳажвий роликлари билан халқимизга яхши таниш бўлган Озод Шукруллоев «Халқлар дўстлиги» санъат саройида «Stand up shou» номли концерт дастурини тақдим этди. Эътиборлиси шундаки, мазкур дастур катта саройда намойиш этилган илк ўзбек stand up’и ҳисобланади. Ижодкорнинг таклифига кўра, «Дарё» мухбирлари концертга бориб, фото ва видеорепортаж тайёрлади.
— Ҳаяжон бор, аммо бу биринчи кулгидан кейин йўқолади. Бу йилги концертда одамлар кутган куй-қўшиқ ва оилавий чиқиш ҳам бор. Яъни партнёрим Мафтуна ва Индира билан бирга ажойиб номер тайёрлаганмиз, — дейди Озод Шукруллоев.
Ижодкорни қўллаб-қувватлаш учун қизиқчи Зокир Очилдиев ва Элмурод Ҳақназаровлар ташриф буюриб, унга омад тилашди.
«Дизайн» жамоасининг аъзоси Элмурод Ҳақназаров ҳамкасбига омад тилаб, унинг ҳазилларини оилавий томоша қилиш мумкинлигини алоҳида таъкидлади.
Озод Шукруллоевнинг дўсти ва доимий ҳамкори Ислом Каримов дастурга бошловчилик қилди. У дўсти концерт учун бир йилга яқин тайёргарлик кўргани ва кейинги концерт бундан-да катта саройда бўлишини тилади.
Индира Мифтахова эса Озод Шукруллоев билан кўрсатув сабаб танишгани, у нафақат яхши пластик жарроҳ ва қаламкаш эканлигини ҳам таъкидлаб ўтди.— Озод Шукруллоев яхши инсон ва меҳнаткаш ижодкор. У бир неча йил аввал «Учинчи концертим ‘Халқлар дўстлиги’ санъат саройида бўлади», деганда ҳайрон бўлгандик. Ҳақиқатан ҳам шундай бўлди. Ундан аввалга иккита концерти ҳам «бомба» бўлганди. Қувонарлиси, концертга нафақат ёшлар, балки кўпни кўрган нуроний инсонлар ҳам ташриф буюришган, — дейди Индира Мифтахова.
Озод Шукруллоев аввалги дастурларидан фарқли равишда бу гал қўшиқлар ҳам ижро этди.
Унинг бу галги концерти «Халқлар дўстлиги» санъат саройида ўтказилган илк stand up бўлишига қарамай, зал томошабинлар билан тўлди.
Ижодкорнинг навбатдаги ҳазиллари ҳам Бухорода ўтган болалиги, ота-онаси ва Тошкентга келган кунлари билан боғлиқ бўлди. Гап-сўзлари халқона бўлгани учун томошабинларга юқори кайфият улаша олди.
Озод Шукруллоев партнёри Мафтуна Шокирова билан катта саҳнада оилавий комедияни намойиш этишди. Яъни интернетга муккасидан кетган эр ва ундан эътибор кутаётган аёл.
Индира Мифтахова Мафтуна Шокирова билан сериал съёмкасида танишиб қолгани ва шевада яхши гаплашолгани учун уни ҳамкорликка таклиф этганини таъкидлаб ўтди.
— Менга пицца олиб берганидан кейин экрандаги бахти очилиб, омади юришиб кетди. Бўлмаса, бу ролга бошқа актрисани олишим ҳам мумкин эди, — деб кулди Индира Мифтахова.
Концерт аввалидаги чиқишларда Озод Шукруллоевнинг қаттиқ ҳаяжонда эканлигини сезиш қийин эмасди. Шу боисданми, бу чиқишлар унчалик қизиқарли эмасдек туюлди. Аммо театрлашган томошадан кейин Озод Шукруллоевнинг ҳазиллари барчага манзур бўлди. Ҳақиқатан унинг чиқишларини бемалол оилавий томоша қилиш мумкин.
Видеони тўлиқ ҳолда «Дарё»нинг YouTube’даги каналида томоша қилишингиз мумкин.
Мавзуга доир:
