Zuhra Soliyeva salkam 60 kiloga ozishiga yordam bergan operatsiya uchun uyini sotgani haqidagi mish-mishlarga izoh berdi (video)

Komik rollari bilan muxlislar qalbidan joy olgan aktrisa Zuhra Soliyeva “Omon-Omon” ko‘rsatuviga bergan intervyusida oshqozon kichraytirish operatsiyasidan so‘ng salkam 60 kilogramga ozgani, bu operatsiya uchun uyini sotgani va tashqi ko‘rinishi sabab rollarga taklif etilmay qo‘ygani haqida tarqalgan mish-mishlarga javobi, operatsiya qildirish bo‘yicha undan qaysi shou-biznes vakillari maslahat so‘ragani, operatsiyaning salbiy tomonlari, xonandalikda ham o‘zini sinab ko‘rayotgani haqida gapirdi.

Zuhra Soliyeva uyini sotib oshqozon kichraytirish operatsiyasini qildirganmi?

“Zuhra Soliyevaning hozirgacha uyi bo‘lmagan va hali ham yo‘q. Yig‘gan pulimga operatsiya qildirganman, u pulga bitta uyning romini ham bermaydi. Operatsiya uydan ancha arzon. O‘ylab qarasam, sog‘lig‘imga asta-sekin zarar yetyapti, kundan-kun orqaga ketayotganimni sezdim”, — deydi aktrisa.

Aktrisa operatsiyadan so‘ng salkam 58 kilogrammga ozgani haqida

“Avval 110 kilogramm edim, hozir vaznim 62 kilogramm bo‘lgan. Do‘mboq edim, keyinchalik sog‘lig‘im yomonlashgani sabab u shishga aylandi. Doktorlar hozir hammasi yaxshi deyishyapti.

Oddiy inson ham, ya’ni bu muolajani qilmagan inson ham shifokorga borsa, u nima yeysiz, iloji boricha yog‘li ovqat, ko‘p shirinlik, un mahsulotlaridan bo‘lgan ovqatni yemang deydi. Ushbu muolajada inson o‘zini avtomatik ravishda shu narsalardan tiyarkan. O‘zi ovqatga ruju qo‘ygan odam emasman, oldin ham kam ovqat yerdim, ko‘p insonlar shishib ketganimga, kamroq ovqat yeyishim kerakligini va keyin ozishim mumkinligini aytdi. Menga bu gap yoqmas edi, chunki ko‘p ovqat yeydigan odam emasman”, — deydi Zuhra Soliyeva.

Zuhra Soliyeva operatsiyaning salbiy tomoni va bu operatsiyadan so‘ng o‘z ustida ishlayotgani haqida

“Salbiy tomoni ko‘p ovqat yeyilsa, 5, 6-yildan keyin oshqozon yana kengayib ketadi. Oshqozon shunaqa organ, u insonning o‘z qo‘lida. Operatsiya qildirdim, bo‘ldi, yonboshlasam ozib ketaman deb aytish kerak emas. Inson o‘zining ustida ishlashi kerak. Menga operatsiyadan keyin yaxshi natija bo‘lganini aytishdi. Men ham operatsiya qildirish bilan cheklanmadim, sport bilan muntazam shug‘ullanaman. Oldin nima ovqat yegan bo‘lsam hammasini yeya olaman, faqat buni o‘zimga ep ko‘rmayapman”, — deydi aktrisa.

Aktrisa oshqozon kichraytirish operatsiyasini qaysi shou-biznes vakillariga tavsiya qilgan?

“Tavsiya berganlarim ham, maslahat so‘raganlari ham bo‘ldi. Masalan, Feruza Jumaniyozova, Shahnoza Otaboyeva, Muyassar Berdiqulova mendan bu haqda so‘radi”, — deydi Zuhra Soliyeva.

“Albatta operatsiyaning salbiy tomonlarini ham o‘rgandim. Birinchi navbatda shifokor tanlashga alohida e’tibor beraman, uning qaysi oliygohni bitirgani, qanday ishlar qilganini, bemorlari undan mamnunmi, shuni o‘rganib keyin boraman. Bu operatsiyaning bitta minus tomoni agar ovqat yeyishni yaxshi ko‘ruvchilar bo‘lsa, oldingidek ikki kosa, uch kosa yoki bir kosa ovqat yemaydi va oldin yegan narsalarining yarmining yarmini yeydi. Unda ortig‘ini oshqozon ko‘tarmaydi”, — deydi aktrisa.

Zuhra Soliyeva operatsiya qildirganidan keyin kinoga taklif qilinmayotgani haqida tarqalgan mish-mishlarga javobi 

“Takliflar operatsiya qildirishimdan oldin ham, hozir ham kamaygani yo‘q. Biroq hozir avvalgi obrazlarimga qo‘rqib-qo‘rqib chaqirishmoqda, chunki u paytda shaddod, ko‘p janjal qiladigan, cho‘rtkesar ayollarning obrazini yaratganman. Oldin gavdasi shunaqa, shunga mos rol o‘ynaydi deb chaqirishardi, hozir ozganimdan keyin unaqa obrazlarga qo‘rqib chaqirishadi. Bunaqa ‘kichkina’  Zuhra bo‘lib obrazlarni qanday o‘ynaydi deb o‘ylashgan. Obraz mening ichimda, uni ‘kesib’ tashlamadim. Shuning uchun ular chaqirgandan keyin pushaymon yemayapti, o‘sha-o‘sha ekansiz deyishmoqda”, — deydi aktrisa.

Aktrisa xonandalikda o‘zini sinab ko‘rayotgani to‘g‘risida

“Xonandalikka hech qachon da’vogarlik qilmaganman. To‘y-marosimlarda ham qo‘shiq aytaman, qanaqa qo‘shiq aytasiz deb so‘rashsa, o‘zimni qo‘shig‘imdan tashqari barchanikini deb javob beraman. Professional darajada yondashib qo‘shiqchi bo‘lmasman, lekin yaxshi kompozitor o‘zimga she’r, matnlari yoqadigan qo‘shiq olib kelsa, mana buni ayting, sizning qo‘shiq aytganingiz yoqdi, desa aytaman”, — deydi Zuhra Soliyeva.

Mavzuga doir:

• Zuhra Soliyeva oshqozonini kichraytirish operatsiyasidan so‘ng ikki oyda 15 kg ozganini ma’lum qildi (video).
• Instagram: Operatsiyani boshdan kechirgan Zuhra Soliyeva, Yulduz Usmonovaning navbatdagi murojaati, Nigora Karimboyeva Dilnoza Kubayevadan qizg‘angan rol.
• “Mana senga bola, deb ichimga tepardi”. Zuhra Soliyeva turmush o‘rtog‘i tomonidan muntazam kaltaklangani haqida so‘zlab berdi (video).
• Saida Rametova jiyani Zuhra Soliyeva haqida: Uning qanotlarini sindirishni istamayman (video).