Ўзбекистон ва Ислом ҳамкорлик ташкилоти ўртасидаги ҳамкорликни кенгайтиришга доир келишувга эришилди

15 август куни Саудия Арабистонининг Жидда шаҳрида Ўзбекистон инвестициялар ва ташқи савдо вазири Жамшид Хўжаевнинг Ислом ҳамкорлик ташкилоти (ИҲТ) бош котиби Ҳиссейн Брахим Таҳа билан учрашуви бўлиб ўтди, деб хабар бермоқда Дунё ахборот агентлиги.

Қайд этилишича, учрашувда томонлар Ўзбекистон ва ИҲТ ўртасидаги ҳамкорликни ривожлантиришнинг ҳозирги ҳолати ва истиқболлари тўғрисида фикр алмашган.

Ўзбекистон вакиллари томонидан ИҲТнинг Ислом оламининг истиқболли минтақалараро ва халқаро ташаббусларини муваффақиятли илгари сураётган, шунингдек, сиёсий, савдо-иқтисодий, транспорт-коммуникация ва маданий-гуманитар соҳаларда ташкилотга аъзо давлатлар ўртасидаги муносабатларнинг фаол ривожланишини таъминлайдиган нуфузли халқаро ҳукуматлараро Ислом ташкилотларидан бири сифатидаги аҳамияти қайд этилган. «Ислом–тинчлик ва тараққиёт дини» тамойилига асосланган самарали мулоқот платформаси сифатида ИҲТни ривожлантиришни ҳар томонлама қўллаб-қувватлашга тайёрлик билдирилган.

Ўзбекистон бугунги кунда ИҲТнинг роли ва аҳамиятини мустаҳкамлашга ижобий ҳисса қўшишда давом этаётгани таъкидланган. Ташкилот раҳбарияти икки томонлама ҳамкорликни сифат жиҳатидан янги босқичга олиб чиқиш мақсадида Ўзбекистон билан сиёсий, савдо-иқтисодий, транспорт-коммуникация ва маданий-гуманитар соҳаларда кўп қиррали ҳамкорликни ривожлантириш учун барча саъй-ҳаракатларни амалга оширишга тайёрлигини билдирган.

Орол денгизининг қуриши оқибатларини бартараф этиш ва мамлакат аҳолисининг тоза ичимлик сувидан фойдаланиш имкониятларини кенгайтириш чораларини назарда тутган ҳолда атроф-муҳитни муҳофаза қилиш соҳасида аниқ лойиҳаларни амалга ошириш истиқболлари муҳокама қилинган. Ушбу йўналишларда мавжуд тажриба ва илғор технологиялар билан тизимли равишда алмашиш бўйича келишувга эришилган.

Томонлар, шунингдек, Ўзбекистоннинг ташкилотга аъзо давлатлар билан транспорт-логистика муносабатларини ривожлантириш борасида янги ташаббусларни ишлаб чиқиш бўйича саъй-ҳаракатларни бирлаштириш зарурлиги тўғрисида келишиб олган.

Учрашув якунида ИҲТ ва Ўзбекистон ўртасидаги ҳамкорликни кенгайтиришга қаратилган амалий ҳамкорликни фаоллаштириш бўйича келишувга эришилган. Шунингдек, томонлар «Хива–ИҲТ 2024 сайёҳлик пойтахти» тадбирларини ташкил этиш доирасида ҳамкорлик тўғрисидаги битим юзасидан келишиш ва тасдиқлашни тезлаштиришга келишиб олган.