O‘zbekiston va Islom hamkorlik tashkiloti o‘rtasidagi hamkorlikni kengaytirishga doir kelishuvga erishildi

15-avgust kuni Saudiya Arabistonining Jidda shahrida O‘zbekiston investitsiyalar va tashqi savdo vaziri Jamshid Xo‘jayevning Islom hamkorlik tashkiloti (IHT) bosh kotibi Hisseyn Braxim Taha bilan uchrashuvi bo‘lib o‘tdi, deb xabar bermoqda Dunyo axborot agentligi.

Qayd etilishicha, uchrashuvda tomonlar O‘zbekiston va IHT o‘rtasidagi hamkorlikni rivojlantirishning hozirgi holati va istiqbollari to‘g‘risida fikr almashgan.

O‘zbekiston vakillari tomonidan IHTning Islom olamining istiqbolli mintaqalararo va xalqaro tashabbuslarini muvaffaqiyatli ilgari surayotgan, shuningdek, siyosiy, savdo-iqtisodiy, transport-kommunikatsiya va madaniy-gumanitar sohalarda tashkilotga a’zo davlatlar o‘rtasidagi munosabatlarning faol rivojlanishini ta’minlaydigan nufuzli xalqaro hukumatlararo Islom tashkilotlaridan biri sifatidagi ahamiyati qayd etilgan. “Islom–tinchlik va taraqqiyot dini” tamoyiliga asoslangan samarali muloqot platformasi sifatida IHTni rivojlantirishni har tomonlama qo‘llab-quvvatlashga tayyorlik bildirilgan.

O‘zbekiston bugungi kunda IHTning roli va ahamiyatini mustahkamlashga ijobiy hissa qo‘shishda davom etayotgani ta’kidlangan. Tashkilot rahbariyati ikki tomonlama hamkorlikni sifat jihatidan yangi bosqichga olib chiqish maqsadida O‘zbekiston bilan siyosiy, savdo-iqtisodiy, transport-kommunikatsiya va madaniy-gumanitar sohalarda ko‘p qirrali hamkorlikni rivojlantirish uchun barcha sa’y-harakatlarni amalga oshirishga tayyorligini bildirgan.

Orol dengizining qurishi oqibatlarini bartaraf etish va mamlakat aholisining toza ichimlik suvidan foydalanish imkoniyatlarini kengaytirish choralarini nazarda tutgan holda atrof-muhitni muhofaza qilish sohasida aniq loyihalarni amalga oshirish istiqbollari muhokama qilingan. Ushbu yo‘nalishlarda mavjud tajriba va ilg‘or texnologiyalar bilan tizimli ravishda almashish bo‘yicha kelishuvga erishilgan.

Tomonlar, shuningdek, O‘zbekistonning tashkilotga a’zo davlatlar bilan transport-logistika munosabatlarini rivojlantirish borasida yangi tashabbuslarni ishlab chiqish bo‘yicha sa’y-harakatlarni birlashtirish zarurligi to‘g‘risida kelishib olgan.

Uchrashuv yakunida IHT va O‘zbekiston o‘rtasidagi hamkorlikni kengaytirishga qaratilgan amaliy hamkorlikni faollashtirish bo‘yicha kelishuvga erishilgan. Shuningdek, tomonlar “Xiva–IHT 2024 sayyohlik poytaxti” tadbirlarini tashkil etish doirasida hamkorlik to‘g‘risidagi bitim yuzasidan kelishish va tasdiqlashni tezlashtirishga kelishib olgan.