Навоийда 15 сотих ерни 90 миллион сўмга сотмоқчи бўлган шахс ушланди

Навоий вилояти Кармана туманида 15 сотих ер майдонини сотмоқчи бўлган шахслар ва уларнинг шериги ушланди. Бу ҳақда Иқтисодий жиноятларга қарши курашиш департаменти хабар берди.

Бош прокуратура ҳузуридаги департамент ҳамда ИИВнинг Навоий вилояти бошқармалари томонидан тезкор тадбир ўтказилган. Унда фуқаролар С.Б. ва С.Х. фуқаро Б.га Кармана тумани «Нурафшон» МФЙ ҳудудидан 15 сотих бўш ер майдонини кадастр бўлимида ишловчи «А.» исмли таниши орқали расмийлаштириб бериш орқали 90 миллион сўмга сотишга келишиб, эвазига 8300 долларни олган вақтида ушланган.

С.Х.нинг кўрсатувига асосан давом этган тадбирда Давлат кадастрлар палатаси Кармана тумани филиали кадастр муҳандиси вазифасида ишловчи А.Э. ўз хизмат хонасида 900 минг сўмни олган вақтида ашёвий далиллар билан ушланган.

Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.