«Блокировкалар ривожланишга фақат зарар келтиради». Ўзбекистонда Twitter блокдан чиқарилди

Ўзбекистонда 1 йилдан ортиқроқ вақт олдин фуқароларнинг шахсга доир маълумотлар тўғрисидаги қонун ҳужжатларини бузувчилар реестрига киритилган Twitter 1 август куни блокдан чиқарилди. Бу ҳақда АОКА хабар берди.

Таъкидланишича, 1 августдан бошлаб мамлакатда Twitter, WeChat ва Вконтакте ижтимоий тармоқларидан тўсиқларсиз фойдаланиш имконияти тўлиқ тикланмоқда. TikTok платформаси билан музокаралар давом этмоқда, натижалари юзасидан қўшимча хабар берилади.

«Блокировкалар ривожланишга фақат зарар келтиради», — дейилди хабарда.

Эслатиб ўтамиз, 2021 йил июль ойида Ўзбекистонда TikTok ва Twitter’нинг очилиши секинлашди. 2 июль куни эса айрим ижтимоий тармоқлар, хусусан, TikTok’дан фойдаланиш расман чекланди. 2022 йилнинг февраль ойида Ўзбекистонда TikTok’ни бутунлай блоклаш таклиф қилинганди. Бунга адлия вазири муносабат билдириб, ахборот эркин тарқатилиши тарафдори эканини айтган ва жаҳолатга қарши маърифат билан курашиш кераклигини таъкидлаган.

2022 йилнинг 16 март куни Ўзбекистонда Twitter ва TikTok VPN иловаларисиз ишлай бошлаган. Бироқ кўп ўтмай ижтимоий тармоқларга кириш яна чекланганди.

Аввалроқ — 2022 йил 25 март куни Skype Ўзбекистонда эркин очила бошлаган эди. У ҳам TikTok ва Twitter каби фуқароларнинг шахсга доир маълумотлар тўғрисидаги қонун ҳужжатларини бузувчилар реестрига киритилганди.

Маълумот учун, «Ўзбекистон Конституциясига ўзгартишлар киритиш тўғрисида»ги қонун лойиҳасига кўра, мамлакатда ҳар кимга интернетдан эркин фойдаланиш ҳуқуқи берилмоқда.