«Тинчлик — жуда бебаҳо неъмат». Қорақалпоғистон мусулмонлари қозияти қозиси аҳолига видеомурожаат билан чиқди

Қорақалпоғистон мусулмонлари қозияти қозиси Шамсуддин Баҳауддинов видеомурожаат билан чиқиб, аҳолини провокацияга берилмасликка ва тинчликнинг қадрига етишга чақирди.

«Пайғамбаримиз Муҳаммад мустафо саллаллоҳу алайҳи васаллам ўзининг муборак ҳадисларида: Икки неъмат бор. Бу икки неъматнинг қадрига кўпчилик инсонлар етмайди. Уларнинг биринчиси тан саломатлиги бўлса, иккинчиси тинчлик неъматидир, дея баён этган.

Азизлар, 1-2 кундан бери элимизда бўлиб турган воқеалардан ҳаммамизнинг хабаримиз бор. Шу мақсадда ҳурматли президентимиз Нукусга келиб, нуронийлар, депутатлар билан учрашиб, халқимизнинг тилак-истакларини эшитди ҳамда бугунги кунда норозилик уйғотаётган баъзи бир масалаларга ойдинлик киритди. Яъни Ўзбекистон Республикаси Конституциясининг 70, 71, 72, 74, 75-моддаларини амалдаги таҳрирда ўзгаришсиз қолишини маълум қилди.

Азизлар, тинчлик – бу жуда улкан, бебаҳо неъмат. Унинг қадрига етиш ҳар биримизнинг вазифамиз. Тинчликни сақлаш, унинг қадрига етиш пайғамбар алайҳиссалом муборак ҳадисларида айтганларидек, шу юртда яшаётган ҳар бир фуқаронинг, мўмин-муслималарнинг вазифаларидан», — деган қози Баҳауддинов.