Бугун,

  • USD 10940.05
  • RUB 182.26
  • EUR 11121.65

Ўзбекистон Республикаси Президенти Шавкат Мирзиёевнинг ғояси ва ташаббуси билан бунёд этилган, Янги Ўзбекистоннинг учинчи ренессанси пойдевори ҳисобланган Uzbekistan GTL заводида Ўзбекистон нефть ва газ-кимёси саноатининг тарихида илк бор синтетик ёқилғи маҳсулотлари ишлаб чиқариши бошлангани энг қувонарли воқеалардан бири бўлди.

«Ўзбекнефтгаз» АЖ томонидан ушбу жараён билан жамоатчиликни яқиндан таништириш мақсадида пресс-тур ташкиллаштирилди. «Ўзбекнефтгаз» АЖ бошқарув раиси Меҳриддин Абдуллаев ҳамроҳлигида журналист ва блогерлар Қашқадарё вилояти Ғузор тумани ҳудудида жойлашган Uzbekistan GTL заводида бўлиб, заводдаги ишлаб чиқариш жараёни билан яқиндан танишдилар.

Бошқарув раиси мазкур воқеа республиканинг замонавий нефть-кимё ва нефть-газни қайта ишлаш саноати ривожида янги технологик босқич ҳисобланаши, ушбу кун Ўзбекистонда илк бор синтетик суюқ ёқилғи ишлаб чиқариши йўлга қўйилганлигига рамзий маънода тарихий куни ҳисобланашини маълум қилди.

Журналистлар ва блогерлар билан завод ҳудудида матбуот анжумани ташкил этилди. Қизғин муҳокамалар остида ўтган ушбу тадбирда бошқарув раиси журналистларни қизиқтирган барча саволларга жавоб берди. Аввало бу маҳсулот харидоргир эканлиги, нафақат маҳаллий корхоналар балки хорижий йирик корхоналар ҳам қизиқиш билдириб, маҳсулотга харидор бўлаётгани айтиб ўтилди.

Бундан ташқари, заводда сўнгги босқич қурилиш-монтаж ишлари пандемия даврига тўғри келгани, коронавирус пандемияси сабаб хорижий мутахассисларнинг Ўзбекистонга етиб кела олмагани, шу сабаб маҳаллий мутахассислар меҳнати билан қуриб битказилгани алоҳида таъкидланди.

«Ўзбекнефтгаз» АЖ бошқарув раиси 2022 йилнинг 29 июнь куни соат 7:30 да Uzbekistan GTL заводида Ўзбекистон нефть ва газ-кимёси саноатининг тарихда биринчи синтетик GTL дизель маҳсулоти ишлаб чиқарилгани ва илк маҳсулот олинганини, айнан ўша онлар Ўзбекистон нефть-газ саноати тарихида ўзига хос янгилик бўлганини билдирди.

Эришилган келишувларга кўра, 5 минг тонна миқдорида ишлаб чиқарилган синтетик дизелнинг биринчи партияси Навоий кон-металлургия комбинатига юборилиши маълум қилинди.

Бошқарув раиси юқори халқаро стандартларга жавоб берадиган GTL маҳсулотлари биринчи навбатда, республиканинг нефть маҳсулотларига, хусусан, дизель ёқилғиси ва керосинга, шунингдек, суюлтирилган газга бўлган ички эҳтиёжини қоплаш учун етказиб берилишини, ишлаб чиқарилаётган маҳсулотлар юқори сифатли бўлгани учун экспорт қилиш имконияти ҳам мавжуд эканлигини айтиб ўтди. Бошқарув раиси журналист ва блогерлар орқали ушбу завод қурилишида қатнашган ва ҳозирда меҳнат қилаётган барчага ўз миннатдорчилигини изҳор қилди.

Бундан ташқари яна бир бор, заводнинг умумий майдони 135 гектар майдонни эгаллаши, заводда 4 хил турдаги ёқилғилар ишлаб чиқарилиши (авиакеросин, сиқилган газ, дизель, нафта), Uzbekistan GTL дунёдаги энг йирик 5 та заводдан бири ҳисобланиши таъкидлаб ўтилди.

Шунингдек, заводнинг тантанали очилиш маросимида Президентимиз томонидан берилган топшириқлар ижросини амалда бажариш мақсадида талабалар амалиётни GTL заводида ўташлари тўла таъминланаётгани маълум қилинди.

Ўз навбатида, Uzbekistan GTL заводи эҳтиёжлари учун зарур бўладиган маҳсулотлар, бутловчи буюм, материаллар ҳамда саноат хизматларини маҳаллийлаштириш, маҳаллий корхоналар билан саноат кооперацияси алоқаларини ўрнатиш ишлари борасида ҳам маълумотлар берилди.

Эслатиб ўтамиз, заводида йилига 3,6 миллиард метр куб табиий газ қайта ишланиб, 1,5 миллион тонна тайёр суюқ маҳсулотлар ишлаб чиқарилади. Жумладан, 307 минг тонна авиакеросин, 724 минг тонна дизель ёқилғиси, 437 минг тонна нафта, 53 минг тонна суюлтирилган газ тайёрланади, йилига умумий қиймати 1 миллиард АҚШ доллари ёки 12,8 триллион сўмдан ортиқ импорт ўрнини босувчи нефть маҳсулотлари ва углеводород хом ашёларини ишлаб чиқариш режалаштирилган.

«Ўзбекнефтгаз» АЖ матбуот хизмати

Изоҳ
Асосий янгиликлар