2021 йил ва 2022 йилнинг ўтган даврида (1 июнь ҳолатига) республика бўйича ер участкасини ўзбошимчалик билан эгаллаш билан боғлиқ 24 511 та (5 164,7 гектар) ҳолат аниқланган. Бу ҳақда Кадастр агентлиги хабар берди.
Маълум қилинишича, агентлик органлари томонидан берилган ёзма кўрсатмалар асосида 11 228 та ҳолатда 3 050,5 гектар (46 фоиз) майдондаги қонунбузилишларни ихтиёрий бартараф этилиши таъминланган. Ўзбошимчалик билан эгалланган майдонларни қайтариш ҳақида судларга 11 687 та даъво аризалари киритилган.
Ерга оид қонун бузилиши ҳолатларида жиноят аломатлари кузатилган 1 782 та иш ҳужжатлари прокуратура органларига юборилган. Олиб борилган назорат тадбирларда 44 438 нафар (2022 йилда 14 338 та) шахс маъмурий жавобгарликка тортилган.
Шунингдек, Кадастр агентлиги томонидан Ерга оид қонун бузилиш ҳолатларини олдини олиш мақсадида 4 408 маротаба (2022 йилда 1 069 маротаба) профилактик тадбирлар ўтказилган.
Ер ва кадастр назоратини автоматлаштириш, коррупция ҳолатларини олдини олиш мақсадида ерга оид ҳуқуқбузарликларни аниқлашдан бартараф этилгунга қадар мониторингини юритувчи «Э-ер назорат» автоматлаштирилган ахборот тизими амалиётга жорий этилган.
2022 йилнинг 5 ойида ер участкаларини ўзбошимчалик билан эгаллаш билан боғлиқ 4 652 та ҳолатлар аниқланиб, ҳуқуқбузарларга берилган ёзма кўрсатмалар асосида 3 241 та ҳолат белгиланган муддатда ихтиёрий бартараф этилгани сабабли, ҳуқуқбузарлар жами 22 миллиард сўмдан ортиқ маъмурий жаримадан озод этилган.
«Ҳозирда назоратда бўлган 1 411 та ҳолатда ер участкаларини ўзбошимчалик билан эгаллаган шахслардан ҳам белгиланган муддатларда ҳуқуқбузарлик ҳолатларини ихтиёрий бартараф этилган тақдирда маъмурий жаримадан озод этилади», — дейилади хабарда.
Изоҳ (0)