Тошкент ҳайвонот боғида онаси билан айланиб юрган қизалоқ бегемот волери яқинидаги тўсиқдан ўтиб, ҳайвонга тош ва чўплар улоқтирди. Ушбу ҳолат акс этган видеони ҳайвонот боғи ахборот хизмати эълон қилди.
«Куни кеча ёнида катта одам бор қизалоқ Жудининг волерига тош ва чўплар отган, волер ичига кириб олиб, овқат бергандек алдаган.
Бундай қилиш мутлақо мумкин эмас! Биринчидан, Жуди — ҳайвонот боғимизнинг энг кекса жониворларидан бири ва биз уни жуда яхши кўрамиз. У бегемотларнинг қимматли, йўқ бўлиб кетаётган турига мансуб. Уларнинг сони Ер куррасида жуда оз қолди ва дунёнинг ҳамма ҳайвонот боғлари ҳам уларда пакана бегемот яшаши билан мақтана олмайди.
Бундан ташқари, волерга ўз вақтида етиб келган ходимларимиз бўлмаганда, бу вазият қандай тугаши номаълум бўларди.
Азиз дўстлар, жониворларимиз соғ-саломатлигига эътиборлироқ муносабатда бўлинг ва ҳайвонот боғида ўзини тутиш қоидаларини бузманг! Аксинча, одамлар ноёб пакана бегемотларни сақлаб қолиш учун қўлидан келганча уриниши керак», — дейилади боғ ахборот хизмати хабарида.
Мавзуга доир:
Изоҳ (0)