Наманган вилоятининг Учқўрғон туманидаги ошхоналардан бирининг ертўласида қиморхона ташкил этган аниқланди, деб хабар беради Тергов департаменти.
Маълум қилинишича, 2022 йилнинг 27 январь куни Наманган вилояти ИИБ ходимлари томонидан тезкор тадбир ўтказилган. Тадбир давомида 47 ёшли Ю.И. тумандаги «Тунги ёғду» ошхонасининг ертўласини таваккалчиликка асосланган ўйинлар ўтказиш мақсадида стол-стуллар, картон қоғоз ёрдамида ўйин карталари, темир ва ёғочдан ўйин барабани, латта материалдан ўйин қопчаси билан жиҳозлагани аниқланган. У оқ ва қора рангли шарчаларни 1 дан 90 гача тартиб билан рақамлаган ҳолда ўйин карталарини фуқароларга 5 минг сўмдан сотиб, «Бахтли воқеа» қимор ўйинларини қонунга хилоф равишда ташкил этиб келган.
Фуқаро Ю.И. томонидан ноқонуний ташкил этилган таваккалчиликка асосланган «Бахтли воқеа» қимор ўйинида 15 нафардан ортиқ фуқаро иштирок этаётгани, шунингдек, ўйинга тикилган 673 минг сўм пул, юқорида санаб ўтилган жиҳозлар тегишли тартибда процессуал расмийлаштирилган.
Мазкур ҳолат юзасидан Учқўрғон туман ИИБ ҳузуридаги Тергов бўлинмаси томонидан Ю.И.га нисбатан Жиноят кодексининг 278-моддаси 1-қисми (қимор ва таваккалчиликка асосланган бошқа ўйинларни ташкил этиш ҳамда ўтказиш) билан жиноят иши қўзғатилиб, гумон қилинувчи тариқасида жалб қилинган. Ҳозирда тергов ҳаракатлари давом этмоқда.
Аввалроқ Наманганда ноқонуний хўроз уриштириш ўйинларини ташкил қилган шахсга жиноят иши қўзғатилгани тўғрисида хабар берилганди.
Мавзуга доир:
Изоҳ (0)