Ўзбекистон Миллий университетининг Нодир қўлёзмалар музейида сақланаётган «баҳоси миллион доллар» турувчи бир қатор китоблар йўқолгани ҳақида хабарлар тарқалганди. Бош прокуратура матбуот котиби Ҳаёт Шамсутдинов ҳолат тегишли вазирлик ва идораларнинг мутахассисларидан иборат ишчи гуруҳ томонидан ўрганилиб, натижалари ҳақида қўшимча ахборот берилишини билдирганди.
Бош прокуратура ахборот хизмати раҳбарининг «Дарё» сўровига асосан маълум қилишича, текшириш давомида ЎзМУ Ахборот ресурс маркази фондида сақланган XIII—XIX асрларга оид қиймати 2,6 миллиард сўмлик тарихий ва бадиий аҳамиятга эга 56 дона қўлёзма ва 6 дона тошбосма асарлар талон-торож қилингани ва бошқа жиддий қонунбузилиш ҳолатлари аниқланган.
2022 йил 19 февраль куни университет мансабдор ва моддий жавобгар шахслари, ҳусусан Ахборот ресурс маркази директори ва бошқаларга нисбатан Жиноят кодексининг 167-моддаси 3-қисми «а» банди, 207-моддаси 1-қисми ва 227-моддаси 1-қисми билан жиноят иши қўзғатилиб, иш ҳужжатлари тергов ҳаракатлари олиб бориш учун Тошкент шаҳар прокуратурасига юборилган.
Эслатиб ўтамиз, Ўзбекистон Миллий университетида 2018 йилда капитал таъмирлаш ишлари амалга оширилган. Бу жараёнда университетнинг қўлёзмалар сақланувчи тарих музейидаги нодир китоблар вақтинча бошқа жойга кўчирилган (маълумотларга кўра, музейда 1465 номдаги ўзбек, форс, туркий, араб ва тожик тилларида арабча имлода ёзилган қўлёзма китоблар, хат ва ҳужжатлар сақланган).
«Kun.uz» 2021 йил 23 декабрь куни 2019 йилдаги таъмирлаш ишларидан сўнг Ўзбекистон Миллий университетининг нодир қўлёзмалар сақланадиган музейи фаолияти тикланмагани ва у ердаги қимматбаҳо ва ўта нодир ҳисобланган 100 дан ортиқ китоблар сотиб юборилган бўлиши мумкинлигини хабар берганди.
Улар орасида энг қимматбаҳо ҳисобланган қуйидаги уч китоб ҳам борлиги айтилган:- Абу Муҳаммад ибн Абу Бакр Собунийнинг милодий 1261 йилда форс тилида ёзилган «Китоб ул-кифоя фил-ҳидоя» номли қўлёзма асари;
- Шарафиддин Али Яздий томонидан ёзилган «Муқаддимаи Зафарнома» китобининг XV асрга оид дунёдаги иккинчи нусхаси, қўлёзма;
- Алишер Навоийнинг тўлиқ «Хамса» достони ва «Лисон ут-тайр» асарлари кўчирилган ва тилла суви юритилган XIX асрнинг биринчи ярмига тегишли қўлёзмаси (муаллифи номаълум).
Интернетдаги шов-шувлардан сўнг, Миллий университет маъмурияти 24 декабрь куни журналистларга «йўқолган ёки сотиб юборилган» деб айтилаётган нодир китобларни кўрсатган. Ушбу университет магистранти Муҳаммадбобур Юсупов журналистларга кўрсатилган қўлёзмалар айнан можарога сабаб бўлган асарлар эмаслигини таъкидлаганди.
25 декабрь куни университет ахборот хизмати тарқалган маълумотлар юзасидан баёнот берди. Унда, жумладан, шундай дейилганди:
«Мақолада келтирилган ва ‘йўқолган’ деб иддао қилинган ‘манбалар’нинг борлиги ва ўзи асл биринчи нусха эмас, балки қўлёзманинг кўчирма нусхалари бўлиб, айни вақтда тадқиқотчиларнинг изланиш манбаси сифатида очиқ фондда сақланган адабиётлар эканлиги таклиф этилган мутахассис экспертлар томонидан тасдиқлангани маълум қилинди.
ЎзМУ илмий жамоаси ва профессор-ўқитувчилари бундай исботланмаган, тасдиқланмаган, ишчи гуруҳ томонидан ўрганиш ишлари якунланмаган оралиқ мавзуларни трендга чиқарилиши университетнинг кенг жамоатчилик ва халқаро ҳамжамият эътиборидаги нуфузига путур етказиши мумкин деб қабул қилади. Шу билан бирга университетга нисбатан ҳурматсизлик деб ҳисоблайди».
Изоҳ (0)