«Халқ банки»ининг 4,6 миллиард пули ўзлаштирилгани ҳақидаги маълумот «Мухбир Далиев» Telegram-каналида эълон қилинди. Хабарда 10 февраль куни Халқ банкининг 10 дан ортиқ мансабдорлари қамоққа олингани айтилган.
Мазкур ҳолатни аниқлаштириш мақсадида «Дарё» «Халқ банки» ахборот хизмати раҳбари Гулноза Алимова билан боғланди. Банк вакилининг маълум қилишича, бу ҳақда Бош прокуратура ўз саҳифаларида расмий ахборот бермаган.
«Шу сабаб ҳозирда ижтимоий тармоқларда тарқалаётган хабар миш-миш ҳисобланади. Қачонки ахборот Бош прокуратура расмий саҳифаларида берилганидан сўнггина биз ҳам хабар берамиз», – деди Гулноза Алимова.
Шундан сўнг хабарни Бош прокуратура матбуот хизмати «Дарё»га тасдиқлади.Таъкидланишича, Бош прокуратура томонидан АТ «Халқ банки» Андижон вилояти Амалиёт бўлими ходимлари ва бошқаларга нисбатан қўзғатилган жиноят иши юзасидан тергов ҳаракатлари олиб борилмоқда.
Тергов давомида банк ходимлари 4,6 миллиард сўмни ўзлаштирганликлари аниқланган.
Ушбу камомадга йўл қўйган 13 нафар банк ходимларига Жиноят кодексининг 167-моддаси 3-қисми «а» банди (жуда кўп миқдорда ўзлаштириш йўли билан талон-торож қилиш) билан айб эълон қилинган. 11 нафарига қамоқ, 2 нафарига гаров эҳтиёт чоралари қўлланилган.
Тергов ҳаракатлари олиб борилмоқда.
Бундан аввал Сурхондарёда фермер хўжалиги раҳбари 900 млн сўм кредит маблағини ўзлаштиргани аниқлангани, Фарғонада банкнинг мобил иловасидаги техник хатоликдан фойдаланиб, қарийб 700 млн сўм пулни ўғирлаган шахслар ушлангани ҳамда Бухоро вилояти Халқ таълими бошқармаси ўқувчилардан 914,4 млн сўмни ноқонуний йиғмоқчи бўлгани аниқлангани ҳақида хабар берилганди.
Изоҳ (0)