Самарқанд туманида бир-бирига туташ бўлган хонадонларда ёнғин содир бўлди. Бу ҳақда Фавқулодда вазиятлар вазирлиги хабар берди.

Маълум қилинишича, 6 декабрь куни соат 07:30 да Самарқанд тумани «Қозиқўрғон» МФЙда жойлашган хонадонларда ёнғин содир бўлаётгани тўғрисида туман ФВБга хабар келиб тушган.

Мазкур хабарга асосан воқеа жойига 6 та ёнғин-қутқарув экипажи соат 07:42 да етиб бориб,  ёнғин 08:08 да қуршаб олинган ва соат 08:58 да бартараф этилган.

Ҳодиса оқибатида 3 та уйнинг жами 170 квадрат метр майдонида том, шифт ва уй жиҳозлари ёниб зарарланган.

Ёнғин оқибатида жабрланган ва ҳалок бўлганлар йўқ. Ҳозирда ёнғин сабаби ҳамда келтирилган моддий зарар миқдори аниқланмоқда.

Аввалроқ Тошкентдаги хонадонларнинг бирида ёнғин содир бўлгани, Наманганда бир-бирига қўшни икки уйда ёнғин чиққани, Наманганда икки кун ичида олтита хонадонда ёнғин юз бергани тўғрисида хабар берилганди.