6 декабрь куни Қозоғистоннинг Оқўрда қароргоҳида Ўзбекистон президенти Шавкат Мирзиёевни расмий кутиб олиш маросими бўлди. Бу ҳақда давлат раҳбарининг матбуот хизмати хабар берди.
Олий мартабали меҳмон шарафига фахрий қоровул саф тортган. Ўзбекистон ва Қозоғистон давлат мадҳиялари янграган.
Президентлар Шавкат Мирзиёев ва Қосим-Жўмарт Тўқаев фахрий қоровул олдидан ўтиб, расмий делегациялар аъзоларини бир-бирига таништирган, сўнг давлат раҳбарларининг тор доирадаги музокаралари бўлиб ўтган.
Самимият ва ишонч руҳида ўтган учрашувда етакчилар кўп қиррали Ўзбекистон—Қозоғистон шериклигига доир кенг кўламли масалаларни, шу жумладан, сиёсий, савдо-иқтисодий, маданий-гуманитар соҳалардаги ҳамкорликни кўриб чиққан, халқаро ва минтақа кун тартиби юзасидан фикр алмашган.
Қозоғистон президенти Шавкат Мирзиёевни ташрифи билан қутлаб, президент сайловида ишончли ғалаба қозонгани билан яна бир бор табриклаган ва келгуси фаолиятига муваффақиятлар тилаб, ушбу учрашувнинг муҳим аҳамиятини алоҳида қайд этган.
«Сиз Қозоғистонга давлат ташрифи билан келганингиздан жуда мамнунмиз. Ҳамкорликни янги даражага олиб чиқишда ушбу воқеа жуда муҳим. Бугун имзоланадиган ҳужжатлар тўплами шериклигимизга қўшимча суръат бағишлайди. Мамлакатларимиз ҳукуматларига барча саъй-ҳаракатларни қўйилган мақсадларга эришишга қаратиш топшириғини беришга келишиб олдик. Ўйлаймизки, мамлакатларимиз ўртасидаги муносабатлар бутун Марказий Осиё минтақасида барқарорлик ва хавфсизликни таъминлашнинг жиддий омили бўлиб хизмат қилади», — дейди Қозоғистон президенти.
Шавкат Мирзиёев таклиф учун миннатдорлик билдириб, ушбу учрашув Қозоғистон мустақиллигининг 30 йиллиги арафасида ўтаётганини таъкидлаган ҳамда Ўзбекистон халқи номидан биродар қозоқ халқини ушбу қутлуғ сана билан самимий табриклаган, тинчлик-осойишталик, равнақ ва янги зафарлар тилаган.
Бугунги кунда Қосим-Жўмарт Тўқаев раҳбарлигида Қозоғистон биринчи президент – элбоши Нурсултон Назарбоев бошлаган катта бунёдкорлик ишларини давом эттираётгани ва барқарор тараққиёт йўлидан дадил бораётгани таъкидланган.
Ўзбекистон етакчиси икки биродар давлат ўртасидаги дўстлик ва яхши қўшничилик муносабатларининг ривожланиш суръатини мамнуният билан қайд этган.
«Кейинги йилларда ҳамкорлигимизни мутлақо янгидан ташкил этдик ва бугун қўшма саъй-ҳаракатларимиз ўзининг илк салмоқли натижаларини бераётганининг гувоҳи бўлиб турибмиз. Ўзбекистон ва Қозоғистон – табиий иқтисодий ҳамкорлар. Иқтисодиётларимиз рақобат қилмайди, бир-бирини тўлдириб туради. Ўзаро савдо ортмоқда. Жорий йилда товар айирбошлаш рекорд даража — 4 миллиард долларга етиши кутилмоқда. Автомобильда ва темир йўллари орқали юк ташиш ҳажмлари ошмоқда. Авиақатновлар тўлиқ қайта тикланди, янги йўналишлар очилмоқда.
Етакчи корхоналаримиз кооперацияни муваффақиятли кенгайтирмоқда. Кейинги йилларда иқтисодиётнинг деярли барча тармоқларида қўшма корхона ва лойиҳалар сони 6 баробарга ошди», – дейди Шавкат Мирзиёев.
Савдо-иқтисодий ҳамкорлик ривожланиб бораётгани, бунда икки мамлакат ҳудудлари ва тадбиркорлари ўртасидаги тўғридан-тўғри алоқалар муҳим ўрин тутаётгани алоҳида таъкидланган.
Маълумот учун, Ўзбекистон президентининг ташрифи арафасида Туркистон шаҳрида бош вазирлар раислигида Ҳукуматлараро комиссия йиғилиши ва Ҳудудлар форуми ўтди. Куни кеча Қозоғистон пойтахтида қўшма бизнес-форум муваффақиятли ўтказилди. Ушу тадбирлар натижасида жами 6 миллиард долларлик келишув ва шартномалар имзоланган.
Кейинги йилларда қўшма корхоналар сони 6 баробарга ошган. Костанайда автомобиль, автобус ва қишлоқ хўжалиги техникасини ишлаб чиқариш йўлга қўйилган. Туркистон ва Чимкентда замонавий тўқимачилик ва маиший техник корхоналари ишга туширилган. Ўзбекистонда қозоғистонлик ҳамкорлар билан биргаликда энергетика, саноат, кимё, озиқ-овқат тармоқлари, қурилиш соҳасида қатор лойиҳалар амалга оширилмоқда.
«Бугун икки томонлама стратегик шериклигимизни иттифоқчилик муносабатлари даражасига кўтариш тўғрисида тарихий қарор қабул қиламиз. Бу нафақат мамлакатларимиз, балки бутун минтақанинг изчил тараққиёти, барқарорлиги ва равнақи учун улкан аҳамиятга эга бўлади», – дейди Ўзбекистон президенти.
Етакчилар минтақа ва халқаро кун тартибининг томонларни қизиқтирган долзарб масалалари юзасидан ҳам фикр алмашган.
Учрашувда давлат раҳбарлари Ўзбекистон ва Қозоғистон ўртасидаги дўстлик ва яхши қўшничилик муносабатларини янада мустаҳкамлаш борасидаги интилиши қатъий эканини яна бир бор тасдиқлаган.
Эслатиб ўтамиз, Шавкат Мирзиёев Қозоғистон президенти Қосим-Жўмарт Тўқаевнинг таклифига биноан 5 декабрдан буён давлат ташрифи билан Нур-Султонда бўлиб турибди. Ўзбекистон президенти 6 декабрь куни Қозоғистоннинг Нур-Султон шаҳридаги «Отан корғаушилар» («Ватан ҳимоячилари») монументига гул қўйган.
Изоҳ (0)