Ижтимоий тармоқларда Қашқадарё вилоят ҳокими ўринбосари Рустам Йўлдошев ва ХТБ бошлиғи Тўлқин Каримов суратга тушиш учун совға бериб, кейин қайтариб олгани айтилган хабарлар тарқалди. Вилоят Халқ таълими бошқармаси мазкур ҳолатга муносабат билдириб, совғалар қонуний тартиб асосида мактаб балансига кирим қилинганини маълум қилди.
Ижтимоий тармоқларда тарқалган хабарларга кўра, Шаҳрисабз шаҳридаги Маданият саройида умумтаълим мактаблари ўқувчилари ўртасида 5 та муҳим ташаббусни амалга ошириш бўйича Халқ таълими вазирлиги томонидан ўтказилган кўрик-танлов, фестиваль ва спорт мусобақалари ғолиб ва совриндорларини тантанали тақдирлаш тадбири ўтказилган. Тақдирлашдан сўнг ўқувчилардан мусиқа асбоблари олиб қўйилиб, фақат дипломни ўзларида қолдиришган.
Вилоят ХТБнинг маълум қилишича, тантанали равишда тадбирда ўқувчиларга берилган мусиқа жиҳозлари тегишли низом талаблари асосида топширилган.
Қайд этилишича, тантанали топширилган мусиқа асбоблари ўрнатилган қонуний тартиб асосида мактаб балансига кирим қилинган бўлиб, ундан барча умумтаълим мактаб ўқувчилари фойдаланиб келмоқда.
«Англашимиз лозимки, Қашқадарё вилояти ҳокими ўринбосари Рустам Йўлдошев ва Халқ таълими бошқарма бошлиғи Тўлқин Каримовлар суратга тушиш учун мусиқа асбоблари ёки совғаларни бериб, сўнгра уни қайтариб олган мазмунидаги мурожаат ҳақиқатга яқин эмаслигини маълум қиламиз», — дейилади муносабатда.
Қашқадарё вилояти Халқ таълими бошқармаси ахборот хизмати раҳбари Жавоҳир Рустамовнинг Nasafnews нашрига маълум қилишича, ушбу совғалар шахсан ўқувчининг қўлига топширилиши кераклиги танлов низомида кўрсатилмаган.
Аввалроқ Қашқадарёда дарс соатларини сотишга уринган мактаб директори иши юзасидан терговга қадар текширув ҳаракатлари бошлангани, Қашқадарёда ўқитувчиларни мажбурий меҳнатга жалб қилган директор ишдан олингани тўғрисида хабар берилганди.
Изоҳ (0)