6 декабрь куни соат 09:00 дан бошлаб Ўзбекистон миллий телерадиокомпанияси тизимида Foreign Languages телеканали фаолияти йўлга қўйилди. Бу ҳақда ЎзМТРК хабар берди.
Маълум қилинишича, ушбу медиаконтент Вазирлар Маҳкамасининг тегишли қарори ижросига мувофиқ «Оилавий» телеканали негизида фаолиятини олиб боради.
Foreign Languages телеканали аҳоли, айниқса, ёш авлод ўртасида чет тилларини ўрганишни оммалаштириш, талабаларга чет тилларини ўзлаштиришга ёрдам берадиган илмий-оммабоп, ҳужжатли, бадиий фильмлар намойиши, малакали мутахассисларни жонли тил дастурларига жалб қилиш, шунингдек, улар иштирокида асосий кўрсатувлар, видеолар, ўйинлар, кўнгилочар фильмлар яратиш ва эфирга узатиш билан шуғулланади.
Айни вақтда Foreign Languages телеканали ўз тақдимот кўрсатувларини намойиш этмоқда.
Телеканал ўз дастурларини бир кеча-кундузда 24 соат давомида хорижий тилларда эфирга узатади, бунда ҳар куни камида 3 соат эфир вақти хорижий тилларни онлайн ўргатишга ажратилади.
Таъкидланишича, болалар учун мўлжалланган хорижий тилдаги телевизион асарлар дубляжсиз, асл тилида, зарур ҳолларда ўзбек, инглиз ва рус тилларида титрли таржима қилинган ҳолда эфирга узатилади.
Эслатиб ўтамиз, шу йилнинг июль ойида ЎзМТРК тизимида «Ҳидоят сари» илмий-маърифий онлайн телеканали иш бошлаган эди.
Изоҳ (0)