Хитойнинг автомобиль ишлаб чиқарувчи Chery компанияси 2022 йилнинг биринчи ярмида Ўзбекистон бозорига кириб келиши кутилмоқда. Бу ҳақда компания вакиллари Spot’га маълум қилган.
Chery Tiggo 7 Pro.
Фото: All Carz
Дастлаб Pro сериясидаги автомобиллар (Tiggo 8 Pro, Tiggo 7 Pro, Tiggo 4 Pro ва Tiggo 2 Pro) сотувга чиқиши кутилмоқда. Компания айнан қандай моделларни Ўзбекистонга етказиб бермоқчилиги ҳозирча ноаниқ.
Ушбу компания автомобиллари сотилувчи биринчи автосалон Тошкентда очилади. Кейинчалик компания Chery автомобилларини мамлакатнинг яна 7 та шаҳрида тақдим этиш ниятида.
Chery Automobilе Cо 1997 йилда Хитойда ташкил этилган. Компания автомобилларни 80 дан ортиқ мамлакат ва минтақага экспорт қилади, Хитойдан ташқарида 10 та завод, 1500 дан ортиқ чет эл дилерлик марказлари ва хизмат кўрсатиш марказларига эга. Сўнгги 18 йилдан буён Chery енгил автомобиллар экспорти бўйича Хитойда биринчи ўринни эгаллаб келмоқда.
Аввалроқ Ўзбекистонда Renault автомобиллари сотуви бошлангани ҳақида хабар берилган эди. Ушбу компания Ўзбекистонда учта модель — Arkana купе-кроссовери, Kaptur шаҳар кроссовери ва Duster янги авлод йўлтанламасини чиқаради. Ҳозирда сотувда фақат иккита модель бор — Renault Arkana ва Renault Kaptur.
