Бугун,

  • USD 11014.01
  • RUB 191.8
  • EUR 10674.78

Андижон вилоятининг Олтинкўл тумани «Ижтимоият» маҳалласидаги 500 дан зиёд хонадонда 3 мингга яқин аҳоли истиқомат қилади. Бундан 10—15 йил аввал бу маҳалланинг аксарият эркаклари (нафақат эркаклари), водийнинг аксарият маҳалла ва қишлоқларида бўлгани каби, ишлагани Россияга кетарди. Аммо ҳозир ижтимоиятликлар орасида иш излаб хорижга кетадиганлар деярли қолмаган ҳисоби — маҳалланинг ишга яроқли 80 фоиз аҳолиси уйида ўтириб ўз-ўзини банд қилган, мебелсозлик билан шуғулланади (қолган 20 фоизи эса давлат ишида).

Маҳалла раиси Одилжон Даминовнинг сўзларига кўра, «Ижтимоият» сўнгги беш йилда ҳақиқий уста-ҳунармандлар маҳалласига айланган — 2016 йили маҳалладаги 37 та хонадон ҳунармандчилик билан шуғулланган бўлса, ҳозирда 505 хонадондан 425 тасида мебель тайёрланмоқда. Бу маҳаллада тайёрланган жиҳозлар нафақат Андижонда, балки Наманган, Фарғона, Тошкент, Қашқадарё, Сурхондарё каби вилоятларда ва ҳатто Қирғизистонда ҳам талабгир.

Бир замонлар иш учун Россияга қатнаш ўзи учун одатий ҳол бўлган Абдусаттор Маҳкамов бугун оиласи билан бирга стол-стул ясайди. Эслашича, 2004 йили ўғлини бекор юрмасин деб маҳалладаги усталарга шогирдликка берган. Шогирд икки-уч йил ичида мустақил устага айланган. «Устозларидан дуо олиб, уйда иш бошлагандик, шунга ҳам 15 йилдан ошди. Ҳозир ўзимиз шогирд чиқаряпмиз», — дейди Абдусаттор ака.

Фото: «Дарё» / Элёр Мамажонов

Фото: «Дарё» / Элёр Мамажонов

Фото: «Дарё» / Элёр Мамажонов

Фото: «Дарё» / Элёр Мамажонов

Ҳозир буюртмалар жуда кўп — сотиш учун бозорга чиқишга ҳам ҳожат йўқ, мижозлар мебелни ўзи келиб олиб кетади (оила ҳар куни ўртача бир тўплам стол-стулни тайёр қилади); кунлик даромад кунига 300 минг сўмдан кам эмас. «Бу ҳунар ортидан кам бўлмадик. Даромадимизга уй-жой қилдик, ўғлимизни уйлаб, қизимизни узатдик. Энг асосийси, уйда туриб ҳам пул топиш мумкинлигини тушуниб етдик», — дея қўшимча қилади уста.

Адҳамжон Исмоилов маҳаллада кўплаб бошқа усталарнинг устози, «Ижтимоият»даги «мебелчилик ҳаракати пионерлари»дан бири. Ўзи дурадгорлик ва қурувчилик билан шуғулланиб юрган Адҳамжон бундан 17 йил аввал Обидхон ва Насимиддин исмли маҳалладошлари билан маслаҳатлашиб, уй шароитида мебель заводларникидан қолишмайдиган стол-стул ясашни йўлга қўйиш ғоясини рўёбга чиқарган.

Уста Абдусаттор Маҳкамов иш устида.

Уста Абдусаттор Маҳкамов иш устида.
Фото: «Дарё» / Элёр Мамажонов

Фото: «Дарё» / Элёр Мамажонов

Фото: «Дарё» / Элёр Мамажонов

Фото: «Дарё» / Элёр Мамажонов

«Пул йиғиб, керакли асбоб-ускуналарни Обидхоннинг уйига ўрнатдик. Қизиқишда тайёрланган биринчи маҳсулотимизни бозорга олиб чиқдик, иш юришиб кетди. Шу тахлит биргаликда икки-уч йил ишладик, кейинчалик ҳар биримиз ўз уйимизда алоҳида устахона очдик. Бу орада қўни-қўшни боласини шогирдликка бера бошлади. Ҳозирга келиб эса деярли бутун маҳалла ўз уйида шу иш билан шуғулланяпти», — дейди Адҳамжон ака.

Олтинкўл ҳокимлигидан маълум қилишларича, «Ижтимоият» тумандаги энг намунали маҳаллалардан (маҳалладаги деярли ҳамма иш билан бандлиги сабаб Россияга бориб ишлашга зарурат қолмаган, охирги икки йилда жиноятчилик ва оилавий ажримлар йўқолган). Маҳалланинг салоҳияти шу қадарки, ижтимоиятликлар қўшни «Қўшкўприк»даги мебелсозликка қизиқувчи ёшларга «устоз-шогирд» анъанаси асосида иш бермоқда: ижтимоиятлик устозлардан иш ўрганган ёшларнинг қай бири стулларни тайёрлайди, бошқаси унга қумқоғозда ишлов, учинчиси ранг беради.

Тайёр маҳсулот намуналари.

Тайёр маҳсулот намуналари.
Фото: «Дарё» / Элёр Мамажонов

Фото: «Дарё» / Элёр Мамажонов

Харидорларини кутиб турган тайёр стол-стул тўпламлари.

Харидорларини кутиб турган тайёр стол-стул тўпламлари.
Фото: «Дарё» / Элёр Мамажонов

Эътиборга молик томони, қўшни маҳалла ёшлари бу ишларни уйдан чиқмай, «Қўшкўприк»нинг ўзида туриб қилади (расман шундай мақсад борми ё йўқ, буниси номаълум, аммо яқин вақт ичида Олтинкўлда мебелсозларнинг иккинчи маҳалласи пайдо бўлиши эҳтимоли жуда юқори). Дарвоқе, мавжуд салоҳиятдан самарали фойдаланиш мақсадида «Ижтимоият» маҳалласи ҳудудидан 4 гектар ер ажратилиб, кичик саноат зонаси шаклида махсус мебелсозлар кўчаси қурилмоқда — хонадонлардаги устахоналар кейинчалик шу кўчага кўчирилади.

Изоҳ
Асосий янгиликлар